#Қуръон_сабоқлари #1_пора #Бақара_сураси #Маънолари_таржимаси

بنت مختار علي

#Қуръон_сабоқлари #1_пора #Бақара_сураси #Маънолари_таржимаси

БАҚАРА СУРАСИ (62-69-оятлар)
Мадинада нозил бўлган. 286 оятдан иборат.

Бисмиллаҳир роҳманир роҳийм.

Меҳрибон ва раҳмли Аллоҳнинг номи ила бошлайман.

62. Албатта, иймон келтирганлар, яҳудий бўлганлар, насоролар ва собиийлардан кимки Аллоҳга ва охират кунига иймон келтирса ва солиҳ амал қилса, уларга Робблари ҳузурида ажрлари бордир. Уларга хавф йўқ ва улар маҳзун ҳам бўлмаслар.
63. Аҳду паймонингизни олганимизни ва: «Биз сизга берган нарсани қувват билан олинг ва ундаги нарсаларни эсланг, шоядки, тақво қилсангиз», – дея устингизга Турни кўтарганимизни эсланг.
64. Сўнгра, ўшандан кейин ҳам юз ўгирдингиз. Сизга Аллоҳнинг фазли ва раҳмати бўлмаганида, албатта, зиён кўрганлардан бўлар эдингиз.
65. Батаҳқиқ, сизлардан шанба куни тажовузкорлик қилганларни билдингиз. Биз уларга: «Қувилган, хорланган маймунларга айланинг!» – дедик.
66. Бас, буни ундан олдингиларга ва кейингиларга бездирувчи иқоб ҳамда тақводорларга мавъиза қилдик.
67. Мусо ўз қавмига: «Албатта, Аллоҳ сизга бир сигир сўймоғингизни буюрмоқда», – деганини эсланг. Улар: «Бизни эрмак қиляпсанми?» – дедилар. У: «Жоҳиллардан бўлиб қолишимдан Аллоҳдан паноҳ сўрайман», – деди.
68. Улар: «Биз учун Роббингга дуо қил, унинг қандай эканини бизга баён қилиб берсин», – дедилар. У: «Албатта, У Зот: «У – қари ҳам, ёш ҳам бўлмаган, ўшанинг ўртасидаги сигир», – деяпти. Бас, ўзингизга буюрилган нарсани бажаринг», – деди.
69. Улар: «Биз учун Роббингга дуо қил, унинг ранги қандай эканини бизга баён қилиб берсин», – дедилар. У: «Албатта, У Зот: «У – ранги сап-сариқ, қараганларни хурсанд қиладиган сигир», – деяпти», – деди.

Шайх Муҳаммад Содиқ Муҳаммад Юсуф
Тафсири Ҳилол