group-telegram.com/abtqui69/15035
Last Update:
ـ قاعد مع صاحب شركه كبيرة بتاعة طواحين دهب، جلابي بمعنى جلابي تبارك الله.
وبنتونس والموضوع جاب موضوع البلد والغلا والضايقه المعيشيه والكلام ده قالي الناس بقت شفقانه وبتحسد بعضها وبتلاوي ومرات ف الرزق ملاواة وناسين ان الحكايه مقسمه من فوق قلت ليهو كيف يعني..؟
قالي شوف يا ابني، انا قبل سنتين كنت عامل برميل مويه ولافيهو بي شوالات خيش، وبسقي الناس الكوز بي كده..
ده كان مصدر رزقي الانا عايش منو ، انا مفروض م اخجل من الشغل طالما هو حلال، وبقو بلاقوني ناس كتيرة من اهلنا وبعاينو لي معاينه كده، (نظام يا بتاع المويه) استحقار واستصغار م بعدو..
جا مرة واحد كان مسخن ومعرق سقيتو وحاسبتو عادي، كان شايل كيس اسود اها لمن مشى نساهو جمبي، قالي انا حفظت شكلو ، بس م جا راجع ، اليوم الاول، اليوم التاني برضو اها تالت يوم بقيت افتش فيهو، السوق ده انا حافظو حفظ اصلو الزول ده م عترت فيهو..
اها لمن قنعت وبقيت خلاص راجع، لمحت الزول هناك ف محل بتاع اسبيرات.. وبقيت ماشي عليهو نص الهجيرة، وعرقي ده شووو كابي ، اها وصلت الزول م اتذكرني ، قلت ليهو ان شاء الله طيب وسلمت عليهو ومديت ليهو الكيس، قلت ليهو نسيتو جمبي قبل تلاته يوم حوالي الساعه ٢ وربع بالظهر ، ياخ الزول حسيت بيهو اتنفس نفس بتاع راحه ، وقالي والله البلاوي الحصلت ب سبب الكيس ده م بتتخيلا ، اها قالي كدي اقعد قلت ليهو:
" لاحق برميلي م جمبو زول"
لمن قلت ليهو الكلمه دي لامن عيونو رقرقت، المهم خلاني مشيت وبعد نص ساعه جا لاحقني بي بوكسي عالي مظلل قالي اركب قلت ليهو والبرميل؟ قالي ادمسو قبلو 😂
وحياتي اتغيرت ف اللحظه دي، (ربنا قادر)
مشينا والزول حرم ضبح لي وأكرمني، وشغلني معاه ف الحسابات، وبقت عندي نسبه ف الشركه مع الايام وبقيت صحبو شديد وعرفني ع اهلو واولادو، وناسبتهم ، وهو عمل شركتين تاني وانا اجتهدت واشتريت شركتو بالكامل..
بس يا مؤمن تصدق وتآمن ان لحد الان م كنت عارف الكيس كان فيهو شنو؟!
ده سيناريو م كنت بحلم بيهو، بس كنت مقتنع ان الرزق عند الله، وان الزول م يخجل من شغلو تخجل من الحلال ليه ،طالما شغال بي ضراعك مفروض تعتز وتضوق لي كل فلس طعم..
والباقي توفيق واقسام..
بس افهم ان القناعه كنز
#اللبيب_طارق
BY أب طاقيه 🎃🔥
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/abtqui69/15035