group-telegram.com/parkent_tongi/20660
Last Update:
#Инсон_қадри
Инсон ҳаёти давомида шундай муаммоларга дуч келадики, уни ҳал қилишга имкони, билими етмай қолади.
Бундай шароитда уларга далда бўлиш, қўлдан келганча ёрдам бериш жамият ҳаётини ўзгартириб бораверади.
Гапни дангалини айтганда ҳоким Сардор Исоқуловнинг фуқаролар қабулига мурожаатчилар “шу ташвишдан қутилишимга ҳоким ёрдам берса бўлди”, деган фикрда умид билан келади.
Айтилган муаммони ҳал қилиб дуо олиш кимга ёқмайди? Инсон қадрини жойига қўйиб, қўлдан келганча яхшилик қилиш руҳий енгиллик, ҳаёт завқини, икки дунё саодатини беради.
Бироқ умр манзилларида шундай чигал вазиятлар борки, уни ўнглаш осон кечмайди.
Масалан, бугун ҳоким қабулида айтилган бир муаммога диққат қилинг!
Мурожаатчи аёл ҳокимдан оиласи барбод бўлганини айтаркан, унинг туб сабабларини ҳам яшириб ўтирмади.
У эри билан 4 йилдан буён муроса қила олмай келаётган экан. Аёлни иш жойи бор, лекин яшашга уйи йўқ.
Чунки, ўз вақтида уй бўлакларга бўлиниб сотилган, пуллар эса мақсадсиз сарфланган. Натижада оилада келишмовчилик чиқиб, оила барбод бўлган.
Энди эса аёлга уй керак! Хўш, бу масалани ҳоким қандай ҳал қилади?
Ер ажратиш ҳоким ваколатига кирмайди. Қонунчиликка кўра давлат бюджетидан уй-жой қуриш учун маблағ бериш кўзда тутилмаган.
Биргина тўғри ечим аёлга субсидия асосида уй олишига кўмаклашиш! Ҳоким шу масалада ёрдам қилишини айтди.
Умуман олганда, қабулда уй-жой масаласи билан ҳокимга мурожаат қилганлар кўп бўлди.
Улар орасида чиндан ҳам уй-жойга муҳтожлиги учун маҳалласидаги сахий инсонларнинг саховати билан қурилиш қилган, бироқ том қисмини ёпишга қийналиб турган мурожаатчи ҳам ёрдам сўради.
Ҳоким вазиятни шу жойнинг ўзида ўрганиб, унинг муаммосига шерик бўлди.
Қабулда фаол тадбиркорлардан бири туризм масканини барпо этишда амалий ёрдам сўради.
Бунга ҳоким бажонидил рози эканлигини, бироқ лойиҳа қонуний асосда бўлса, доим қўллаб-қувватлашга тайёрлигини билдирди.
Ҳоким ўринбосарлари, тегишли ташкилот мутасаддилари иштирок этган қабулда турли соҳаларда ўз ечимини кутаётган оғриқли муаммолар алоҳида назоратга олинди.
Иқтисодий жиҳатдан ночор шароитда яшаётганларнинг саломатлигини тиклаш ҳақидаги мурожаатларининг ҳеч бири рад этилмади.
Ҳа, қабулга умид билан келганларнинг вазиятини ҳаққоний ўрганиш, чиндан ҳам муҳтожликда яшаётганларга ёрдам қўлини чўзиш бахтли инсонлар сафини ошириб бораверади!
