في أيامكُم ولحظاتكُم الجاية ..

إختاروا
العلاقات والحاجات اللي بتخلّيكم عايشين
في سعادة و راحة بال

و أي حاجة
بتسبّب ليكم ضِـيق وقلَق إتجاهلوها
وأبعِـدوها

دي حياتك إنت!

اختار تفاصيلها بما يُرضي الله تعالى
ثم يرضيك ♡

فاللهُمّ حياةً تغمُرها المسرّات والأمان مع العافية، أن تُبارِك لنا في أوقاتنا وأعمارِنا، وتوفّقنا لِطاعتك وحُسن عبادتك، وتُدخلنا الجنة أجمعين .

ممكن نصلّ على الحبيب! ♥️
#الوتر
#تيسير_الصادق

يوم الجُـمعة صلّـيت العصر
وقعدتَ
أدعي للناس اللي إتفاعلوا مع بوست الدُعاء في صفحة الفيسبوك

وطلّعت الصدقة
للناس اللي صلّوا على الرسول ﷺ

ودعيت لكُـل المُتابعين
ولجميع المُسلمين ♡

لمن خلاص باقي للمغرب دقيقتين
بديت أدعي
لِنفسي ، وعندي حاجة
مُـتمنّـياها وبدعي بيها من شهور

ما كان في علامة ولا إشارة ولا سبَب!

والليلة أنا عايشة شعور
الآية :
" ويرزقهُ مِن حيثُ لا يحتَـسِب " 🌱

اللهم بارِك
والحمدُلله رب العالمين ..

فاللهُـمّ اعطِ كُـلًا منا سُـؤله، اللهم مافي قلوبنا وأكثر، اللهم ارزقنا الرضا والعافية مع السعادة واليَقين .

ممكن نصلّ على الحبيب! ♥️
#الدعاء
#تيسير_الصادق

الليلة لمن جيت أفطُـر
اتذكرتَ أخواتنا
دُعاء عمر، رُبا عمر، وآية عمر ..

قلت ياربي
فطروا ، ياربي بياكلوا ، ياربي حالهُـم كيف

وأكيد ما حيخفى علينا
حال أمهم
وأبوهم وأهلهم وصحباتهم!

دُعاء وأخواتها
أعمارهم بين ١٦ و ٢١ سنة
مفقـودات في مصر من يوم ٧ في الشهر ده

أي زول يشوفهُـم أو يتعرّف عليهم
في مكان
يتواصَـل في الرقم ده
01126770484

ديل أخواتنا
وفي عِـز حـوجتهم لينا

والشـير الواحد بيفرِق!

وبإذن الله نفرَح برجعتهُـم
سالمات غانمات في القريب العاجِل

ممكن نصلّ على الحبيب! ♥️
#مصر
#السودان
#تيسير_الصادق

قال :
مَـرّت ٣ سنوات ..

وخطبتَ للمرة التانية
وربنا تمّـم على خير واتزوّجنا ، ومُنتظرين
مولودنا الأول

وأنا
لِـسه مُواصِـل في قيام الليل🌱

عايش سعيد
ومُتطمّـن ، إتعَـلّمتَ الرضا والتوكُّـل
وعدم التعَـلُّـق!

وعِـرفتَ
طعم الجبُر بعد الصبُر ♡

عِرِفتَ طريق مُناجاة ربنا
وما حأضيـِّعُـه
مهما يكون!

فاللهمّ صبرًا على ما لم نُـحِط به خُـبرا، ارزقنا اليقين وحُسن التوكُّل عليك، أن نغفو على يُـسرٍ و نصحو على رحمةٍ وعافية، وألا يُـفاجئنا إلا الخير والسعادة، فيغمُـر أيامنا لُـطفك وتُـنجّـينا رحمتك في سَيرنا إليك .

ممكن نصلّ على الحبيب! ♥️
#الوتر
#تيسير_الصادق

قبل فترة حسّيت نفسي ما طبيعية!

بِقيت ما بقدر أركّـز ، ولمن أجي أكتب
بتَغلِبني الكِـتابة

يوم قاعدة بقول في أذكار الصباح
قلتَ
هَـي ، أنا طوّلت من رُقيـة الفاتحة

طوالي بَديت أرقي نفسي ♡

ومن اليوم داك
كل الأحاسيس الغريبة إختفَـت
الحمدُلله

اها يوم جُونا ضيوف ، وخالتو بدَت تشتـكي
من ألـَم
في رجولها
ما عِرفَـت ليهُ علاج!

قامت أختي قالت لي :
وصِّـفي ليها اتعالجتي كيف

خالتو ردت سريع :
أوعَى
تقولي لي أبلعي مُـسكن ولا بندول 🤣

قلت ليها :
أبدي
رُقـية الفاتحة ، أي عدد كل يوم
وتمسَـحي على مكان الألَـم
حيزول بإذن الله ♡

والأجمل تقريها في موية
وتشربي
ويشربوا معاك ناس البيت

المُهم يكون عندِك
يَقين
إنه الشافي هو رب العالمين 🌱

تاني يوم الصباح ، خالتو اتصلَت
قالت عملَت
رُقية الفاتحة ، ولأول مرة من شهور طويلة
تقدَر تنوم
بدون مُسكن أو بندول الحمدُلله .

فاللهمّ احفَظ عِبادك من كُل سُـوء، زَيّـن حياة الطيّبين بالصحة والعافية، فتنتثر المسرات في أيامهم فرحًـا، وتختِم لهم دُنياهم بصالح الأعمال.

#القران
#تيسير_الصادق

قالت :
لمن بديت أحفَظ القُرآن
كَـلّمتَ
صحباتي الخمسة يبدوا يحفظوا

بقينا نشجّـع بعض ونتنافَـس
نكرّر سوا
ونختبِـر بعض ، نثبّـت الآيات ونتدارَس التفسير

سُبحان الله
في الفترة دِيـك
كنت بقطّـع صلاة الفجر!

سألناها :
و هسي ، كيف صلاتِك ؟

قالت :
أبشركُم ..

بِفضل الله تعالى بِقيت أصحى
في الثلث الأخير
من الليل ، أصلّي وأدعي وأنتظر الفجر

أصَـلّـيهُ حاضر في وقته ♡

صدق اللي قال :
" طريق القرآن
تبداهُ عشان ينوّر قلبك ، فتلقاهُ
نَـوّر الدُنيا كُـلها حوَليك "

فاللهُـمّ بلّغ السّاعِين تمام الحِفظ والإتقان، اجعلنا من أهله العامِلين به، أنِـر به حياتنا وقلوبنا، و أدخلنا به جنات الخُلد والنعيم .

ممكن نصلّ على الحبيب! ♥️
#الوتر
#تيسير_الصادق

صحبتنا قَـضَّـت فترة الحـرب دي كُلها
في بيتهم في الخرطوم

ماشاءالله عليها صابرة ومُتيقنة ، رُغم إنقطاع
الموية والكهرباء
والإنترنـت لِـفترات طويلة!

في مُكالمة الأسبوع الفات
قالَت لَي :
بت جيراننا سافَرت عُـمان مع أهلها
من بِـداية الحـرب

مشَـت هناك خطَـبها صاحب أخوها
مُقيم في البلد

يحليلي أنا حارسة حِـلّـتنا
لا سافرتَ لا عرّسـتَ 😁

وكانت فرحانة ليها والفرحة واضحة في كلامها!

قلت ليها :
" وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ "

تمّيت الآية وكرّرتَ
ليها :
" وَرِزْقُ رَبِّكَ خَيْرٌ وَأَبْقَىٰ "

وقلتَ ليها :
إن شاء الله
قريب نفرح بيكِ يا سِـت البنات ♡

وقفَلنا على كده ..

أمبارح لقيتها مُرسلة ١٤ رسالة
اتخلعتَ!

دخلتَ لقيت الزغاريد والقلوب 🤣

اللهم بارِك
جاها عريس مُقيم في كنـدا ، وأهله في مكـة
والعقِـد يوم الجُـمعة
بإذن الله
عشان يرسّلوا ليهُ الورق وتقدر تسافِـر ليهُ ♡

ربي يتمّـم ليها على خير
ويسعَِـدها
وعُقبالكُـم كُلكم يا جميلات ..

فاللهم اغنِنا بِك وتُب علينا وارحَمنا، اغفِر لنا إن مدَدنا نظَرنا لما يملك الغَير ونسِينا ما أنعمتَ به علينا، نسألك من نعيمِك الدائم مجبوري الخاطر وقَريرِي الأعيُن والفؤاد .

ممكن نصلّ على الحبيب!♥️
#القران
#الزواج
#تيسير_الصادق

قالت :
بعد تمّيت نضافة البيت والغسيل
قلتَ
آخُـد لَي قيلولة
أنوم شوية قبل العصر يأذن ..

سِمِعتَ أخواني الصُغار عاملين
إزعاج
جنب باب الغرفة!

أبوي جاء قال ليهُم :
أختكم نايمة تعبانة ، رُوقـوا شوية
وأمشوا ألعَـبوا بعيد

حسّـيت بسعادة شديدة ♡

وقلت
ياربي لمن أعـرّس راجلي حيهتمّ بَي
ويحـِن عَـلَـي
كده زي أبوي 🥹

فاللهُمّ اجزِ والـِدايَ عني خيرًا وارزُقني بِـرّهُـما، اجبُر خواطرهما واغفر لهما وارحمهُـما كما رَبّـياني صغيرا .

ممكن نصلّ على الحبيب! ♥️
#تيسير_الصادق

حبوبة قالت لينا :
الله يحفظكُم
ويديكُـم العافية ، وينوّر طريقكُـم
ويعدِل رفيقكُـم ♡

و يكفّـيكُـم شر المشي
في طريق طويل ما مناسب ليكُم

و شر السعي المليان تعَـب وقَسـوة
في حاجة فارغة
ما عندها معنى!

و شر مَـدّة اليد
أكتر من مرة ، في نفس مكان الطَـعنة واللدغة .

آمين آمين
لينا وليكُـم ولكُل الناس ♡

فاللهم قِنا شر ما تمنّيناهُ وبدأناه دون أن نعلَـم ما فيه وإن أظلَـم، أن تعوّضنا خيرًا في كل ما فقَدنا، وتطيّـب كل ما أطفأت ضياءه الأيام .

ممكن نصلّ على الحبيب! ♥️
#الوتر
#تيسير_الصادق

مافي زول أذى رسولنا الحبيب ﷺ
في المدينة
زي عبدالله بن أُبَي بن سلول ..

خذله أكتر من مرة في الغزوات ، و سبّاهُ قِدّام الناس
و اتعدّى على شرف السيدة عائشة!

لكن النبي ﷺ ما ركّز مع ده كُله .

كل اللي شافُه
و ركّز معاهُ
هو عبدالله ولده ، عبدالله ده ولد المُنافق
(الاتنين اسمهم عبدالله)

عبدالله الإبن
أسلم وصاحب النبي ﷺ بحُب
وإخلاص شديد ♡

(يعني الأب منافق والإبن صاحب الرسول ﷺ)

وفي يوم من الأيام
جاء عبدالله الإبن
عشان يكلّم الرسول ﷺ إنه جاهز يقتل أبوهُ .

و قال كده
عشان هو اللي حـيقتل أبوه ، لكن
ما يقتله زول تاني غيره ، وحيقتله لأنه سبّ الرسول ﷺ
واتكلّم في عرضه!

الرسول ﷺ طَبطَب على كتفه
وقال ليهُ :
"بل أحِسن صُحبته" ♡

و وصّاهُ يكون بارّ بأبوهُ اللي هو العدو!

و مات العدو
وجاء الإبن صاحب النبي ﷺ يطلب منه قميص
عشان يكفّن فيه أبوهُ .

قام النبي ﷺ أدّاهُ القميص ، فزاد طمَع الإبن وطلب
من رسولنا الحبيب ﷺ إنه يصلّي على أبوه ..

فوافَق الحبيب المُصطفى ﷺ 🥹

ولازم نلاحظ إنه
رسولنا الكريم عارف كويس من القرآن
إنه صلاته
واستغفاره ما حيفيد ، ومع كده وافَق!

و مشى يصلي على عدوّه
عشان
يجبر خاطر صاحبه اللي هو الإبن ♡

الناس وقفوا مخلوعين وسيدنا عمر بن الخطاب
رضي الله عنه
ما سكَت واعترَض!

لكن رسولنا ﷺ واصَل ، ومشى
وقَـف
قدام جثمان الراجل
اللي ياما أذاه وشتمُه وسبّاهُ ، وصلّى عليهُ صلاة الجـنازة ..

وتسألني لماذا أحبه ♥️

لأنه جابر للخواطر ، لأنه بيرمي ورا ضهرُه حسابات الناس
لأنه رجل تلهث العظمة خلفه
عشان تصل
لِأبعاد نُبله و تعامله الراقي الأصـيل 🌱

فاللهم أحيِنا وأمِتنا على سُنّته، احشُرنا في زُمرَته و ارزقنا شفاعته، وأورِدنا حوضَه هانئين مُطمئنين ومُكرَمين برؤية وجهك الكريم .

ممكن نصلّ على الحبيب! ♥️
#السيرة
#تيسير_الصادق
🌱

حتلقوا
تغيير كبير وجميل في حياتكُـم ♡

حاجات بتتحقق
ودعوات بتُـستجاب ، حتعِـيشوا
الطمأنينة
والسَـكينة
و راحة البال ، مع الأجور والحسنات

لمّـن تلتزمـوا بـوِرد القرآن الكريم 🌱

خمسة آيات
وجه أو وجهين تلاتة ، جزء جزئين
أو ما تَـيَـسَّـر

المُـهم إنك تبدأ ، وتخَـلّـيهُ من أساسيات كُـل يوم

إتفقنا يا أتقياء ؟

فاللهُمّ اجعلني وذُريّتي من أهل القُرآن الكريم الذين هُم أهل الله وخاصّـته، بارِك به أيامنا وأعمارنا، واجعل الجنة مُستقرّنا أجمعين .

ممكن نصلّ على الحبيب! ♥️
#القران
#تيسير_الصادق

ماما عندها صحبتها قريبة ليها شديد
وعلاقتهُـم
جميلة جداً اللهم بارِك ♥️

كلما تجي سِـيرتها
بتقول لينا :
عُـمري ما أنسـى إحترامها و إهتمامها
و وقفاتها معاي!

مرة اتصلتَ بيها
صوتي مُـتغيِّـر
والشبكة طَـشَّـت بعد السلام طوّالي

ما تمّت دقائق
إلا ولقيتها واقفة قِـدّامي!

قالت لَـي :
قُلتَ أحسن أجي أشوفك
و أتطـمّن عليك
وأشـوف يمكن تكوني مُحتاجة لَي في حاجة 🥹♥️
..

يوم كنتَ مُـفرّغة نفسي
عشان أمشي أطَـلّع
شهـادات الخِـبرة من المـُستشفيات اللي اشتغلتَ فيها
الإمتيـاز والخِـدمة

بعد وصلتَ المُستشفى
اتصلَـت بَـي صحبتي عايشة في فرنـسا ، كانت مُقلّـقة
وطلَـبَـت مني
أمشي مع أمها مُقابلة في الدكتور
لأنه أخوها
اللي مفروض يمشي مع أمـهم
عمـَل حـادِث
وموضوع الإجـراءات جَـرّ!

استأذنـتَ من أهلي ومشيت مع أُمـها .

ومن اليوم داك
كلما أقابل صحبتي ولا نتكلم بالتلفون
عيونها تـدَمِّـع
وتقول لَي :
"فكانَ كعبٌ لا ينساها لِطَلحة" 🥹♥️

فـشُكراً و حُـبّـاً
لصحباتنا اللي بحبّونا وبحبّوا
لينا الخير
وبيجبروا خاطـِرنا وبيسعِـدونـا

بندعي ليهم بكُل جميل
وبنقول ليهُم :
يا سِـكة طويلة مليانة حَنين ،، يا نهاية عديلة وكُـلها ضَـي

فاللهمّ قلُوب صديقاتي لا يمسّها حُـزنٌ ولا هَـم ، اجمعنا دُنيا وجَنة في نعيمٍ وعـافية ، واغمُـر أيّامنا القادمة بالخير والبركة والسعادات الكاملة .

ممكن نصلّ على الحبيب! ♥️
#الصداقة
#تيسير_الصادق

كُلما تحِس إنك مُـرهق أو حزين
خلي مشاعرك
تظهر عليك عادي ، وقُـول :
أنا تعبان
أنا حَـزين ..

ولمن تحتاج مُـساعدة في حاجة
أو تحب
تاخُـد راحة = أطلبها
من شريك حياتك أو من الناس اللي حوليك

ما تدِس أحاسيسك ولا تضغط
على نفسك
وصحّـتك!

عيشوا أحزانكُـم وإنكساراتكُـم
ومشاعركُم كُلها
لكن
ما تخلُّـوها تاخُد وقت طويل .

فترة وحتعدّي
وترجعوا أحسَـن مما كُـنتوا بإذن الله ♡

فاللهُـمّ تيسيرًا يُلازم خطوات المَسير، أرِح بالنا وطَمئن قلوبنا، وأدخلنا الجنة أجمعين .

ممكن نصلّ على الحبيب! ♥️
#الوتر
#تيسير_الصادق

عن تجربة والله،
طالما رضيت بقضاء الله وتيقنت أن ما يأتي به الله خير؛
فسيراضيك الله دومًا.

وطالما صبرت على الابتلاء والحزن والضيق؛
فسيراضيك الله.

وطالما آمنت بعوض الله مهما كانت الطرق مغلقة في وجهك؛
فسيراضيك الله

ربنا سبحانه وتعالى يقول:
أنا عند ظن عبدي بي ♡

ونحن والله
نحسن الظن ونؤمن بأن كل ما عند الله خير

ممكن نصلّ على الحبيب! ♥️
#الرضا
#بيوت_متطمنة

لمّـن تجي تعمل أي حاجة
قُـول
أنا بعمل
كده عشان كده ، ومـا تنسى النـيّـة ..

•تعليمك وقرايتك
عشان تاخُـد
أجر طلب العِـلم
وعشان تطوّر
نفسـك وتحسّـن مقدراتك وتفكيرك

ما عشان
الناس قَـروا المجال ده ولا عشان يتقال
عليك قَريت!

•زواجك عشان تبني بيت مُـسلم
يعز الإسـلام
والمُـسلمين
وعشان تعيش حياة طيبة مع شريك حياتك
وأطفالك ♡

ما عشان
اللي في عُـمرك إتزوّجوا ، ولا عشان
خايف القطر يفوت!

•بتشتغِل شُغلك عشان تبني حياة
جميلة
تفاصيلها كده و كده

ما عشان مُـحتاج للقروش
وخلاص!

رسولنا الكريم ﷺ
قال :
" إنـما الأعمال بالنيات " 🌱

عشان كده أحرِص تـخلّي نيتك لله
في الأول
وبعد كده
إختار الأفضل ليك

وما تبني نواياك على
المَـخاوِف مهما يكُـون!

فاللهُمّ إني أسألُك الهُدى والتُّقى والعَـفاف والغِـنى، آتِني ما أرجو على خيرٍ وعافية، أن تُبارِك خطواتي وأيامي، فترزقني حُـسن الخاتمة وتجعل مُستقري جنات الخُلد والنعيم.

ممكن نصلّ على الحبيب! ♥️
#الوتر
#تيسير_الصادق