group-telegram.com/GiyosiddinYusuf/4545
Last Update:
Hech tasavvur qilib ko‘rganmisiz: mushuk odamga aylansa, nima bo‘ladi?
Anni Shmidtning "Mushuklar malikasi Minush" kitobi bizga shunday tasavvur hosil qilishga yordam beradi. Fantastik janrdagi bolalar uchun bo‘lgan ushbu asar kattalar uchun ham qiziqarli va manfaatlidir.
Ushbu kitob orqali biz tasavvurimizni boyitib, dunyoqarashimizni kengaytirish bilan birga ikkiyuzlamachilik, soxtakorlikning umri qisqa ekaniga, yaxshilik hamisha g‘olib bo‘lishi, mehr bilan insonlar-u hayvonlar qalbidan joy egallash mumkinligiga yana bir bor guvoh bo‘lamiz.
Shuningdek, Minushning odamga aylanishiga turtki bo‘lgan voqea bolalarni kashfiyot qilishga undaydi. Itni ko‘rganda yugurib daraxtga chiqib ketadigan odam-mushuk qanday qilib qushlarni yeyishdan bosh tortgani beg‘ubor qalb sohiblarini ta’sirlantirmay qolmaydi.
Kitob 19 bobdan iborat. Odatiy kitoblardan kattaroq hajmda va 192 sahifadan iborat. Har bir bobda mavzuga mos rasmlar berilgan. Kitob Akademnashr nashriyotida chop qilingan.
Kitobni o‘qib chiqqanimdan mamnunman. Uning tili meni juda zavqlantirdi. Kitob tarjima ekaniga qaramasdan o‘z tilimizdagi iboralar, hatto kam qo‘llaniladigan o‘z-o‘zimizniki bo‘lgan so‘zlar ham uchragani juda quvontirdi. Kitob uchun tarjimon va nashriyot jamoasiga, xususan, Sanjar Nazar akaga rahmat aytaman.
#Kitob
@GiyosiddinYusuf
BY G'iyosiddin Yusuf | tarbiya
Share with your friend now:
group-telegram.com/GiyosiddinYusuf/4545