" ጊዜያዊ  የማስጠንቀቂያ ምልክቶችና የጥንቃቄ ማመላከቻዎች በናዳዉ አቅራቢያ ተቀምጠዋል " - ፖሊስ

በደቡብ ምዕራብ ኢትዮጵያ ክልል በካፋ ዞን በጊምቦ ወረዳ ዉሽዉሽ ቀበሌ ልዩ ስም " ቦጫች " ተብሎ በሚጠራበት አከባቢ የካፋ ዞንን ከቦንጋ ፣ ሺሾእንዴ ወረዳ፣ ጨና ወረዳ፣ ሚዛን ፣ ቴፒ፣ ምዕራብ ኦሞ ዞን የሚያገናኘዉ ዋናዉ የአስፋልት መንገድ ሰሞኑን በአከባቢዉ እየጣለ ባለዉ ከባድ ዝናብ መንሸራተቱን ተከትሎ መንገዱ በአንድ በኩል ከባድ ጉዳት አስተናግዷል።

መስመሩ የተሽከርካሪዎች ምልልስ የሚበዛበት በመሆኑ ለችግሩ ዘላቂ መፍትሔ እስኪበጅለት የትራፊክ አደጋ እንዳያስከትል ጊዜያዊ  የማስጠንቀቂያ ምልክቶችና የጥንቃቄ ማመላከቻዎች በአቅራቢያዉ መቀመጣቸው ተገልጿል።

በመስመሩ የሚንቀሳቀሱ አሽከርካሪዎች ተገቢውን ጥንቃቄ እንዲያደርጉ ማሳሰቢያ ተላልፏል።

ይህን መረጃ በአከባቢው ለሚያሽከረክሩ አሽከርካሪዎች በማዳረስ ሁሉም ተባባሪ እንዲሆንም ተጠይቋል።

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahethiopia

" ዜጎች ከማያውቁት ሰው ጋር በማንኛውም የማህበራዊ ሚዲያ መተግበሪያዎች ምንም ዓይነት ግንኙነት ባለመፍጠር ከመሰል ወንጀሎች ራሱን ሊጠብቅ ይገባል " - ፖሊስ

የተለያዩ ሴቶችን ፎቶ ግራፍ ከቴሌግራምና ከቲክቶክ በማውረድ በከፈተው ሀሰተኛ አካውንት እለቃለሁ ብሎ በማስፈራራት ክብርን በማዋረድና የፆታ ግኑኝነት በመጠየቅ የተጠረጠረን ግለሰብ ይዞ ምርመራ እያጣራ መሆኑን የአዲስ አበባ ፖሊስ ጠቅላይ መምሪያ ገለፀ።

ሀምሌ 30 ቀን 20017 ዓ/ም ከምሽቱ 12 ሰአት ተኩል ሲሆን በንፋስ ስልክ ላፍቶ ክ/ከተማ ወረዳ 5 ልዩ ቦታው ብሔረ ፅጌ መናፈሻ እየተባለ ከሚጠራው አካባቢ ነው ወንጀሉ የተፈፀመው።

አንተን አየሁ ሞላ የተባለው ተጠርጣሪ ራሱ ባዘጋጀው ሰቦንቱ ኤጀንት ሰርቪስ የሚል ሀሰተኛ የቲክቶክ አካውንት በመክፈት የግለሰቦችን ፈቃደኝነት ሳይጠይቅ ከቴሌግራም፣ ከቲክቶክ እንዲሁም ሴቶችን መንገድ ላይ በሚጓዙበት ወቅት ፎቶ በማንሳትና ቪዲዮ በመቅረፅ ራሱ በከፈተው አካውንት ላይ አቀናብሮ በመልቀቅ ግለሰቦችን በማስፈራራትና በማስገደድ የፆታ ግኑኝነት ጭምር የሚጠይቅ ግለሰብ መሆኑን የምርመራ መዝገቡ ያስረዳል፡፡

ተከሳሹ ወይዘሮ ሰላማዊት ታደሰን የቤት ተከራይ መስሎ በመቅረብ ስልክ ቁጥሯን በመውሰድ የራሱ ባልሆነ ስልክ ቁጥር በመጠቀም ከቴሌግራም ላይ ፎቶዋን በማውረድና በማቀናበር ግላዊ የፆታ ግኑኝነት ከሷ ጋር እንድትፈፀም ያቀናበረውን ሰነድ በማስፈራሪያነት በመጠቀም ያስገድዳታል።

የግል ተበዳይም " ባለትዳርና የልጆች እናት ነኝ ይህንን ድርጊት ለመፈፀም ፈቃደኛ አይደለሁም " ብትለውም ማስፈራራቱን ባለማቋረጥ ባዘጋጀው ሀሰተኛ የቲክቶክ አካውንት " ሹገር ማሚ " ስለሆነች በእኔ አካውንት ማግኘት ትችላላችሁ በማለት ከአንድ ሺ በላይ ተከታይ ባለው የቲክቶክ አካውንት በማጋራቱ የግል ተበዳይ ለፖሊስ አመልክታለች፡፡

የንፋስ ስልክ ላፍቶ ክፍለ ከተማ ፖሊስ መምሪያ የደረሰውን አቤቱታ መነሻ በማድረግ ግለሰቡን በቁጥጥር ስር አውሎ ለአዲስ አበባ ፖሊስ ጠቅላይ መምሪያ የሴቶች እና ህፃናት ወንጀሎች ምርመራ መላኩን የአዲስ አበባ ፖሊስ ጠቅላይ መምሪያ ገልጿል።

በተጠርጣሪው ግለሰብ ላይ ፖሊስ ባደረገው ምርመራ የማስፋት ተግባር ከሃያ በላይ የሚሆኑ ሴቶች ላይ ተመሳሳይ ድርጊት ለመፈፀም ካዘጋጃቸው ፎቶዎች ጋር መያዙንም ፖሊስ አስታውሷል፡፡

ዜጎች ከማያውቁት ሰው ጋር በማንኛውም የማህበራዊ ሚዲያ መተግበሪያዎች ምንም ዓይነት ግንኙነት ባለመፍጠር ከመሰል ወንጀሎች ራሱን ሊጠብቅ እንደሚገባም የአዲስ አበባ ፖሊስ ጠቅላይ መምሪያ መልዕክቱን ያስተላልፋል፡፡ 

#AddisAbabaPolice

@tikvahethiopia

" በጭጋጋማ የአየር ጸባይ ምክንያት በርከት ያሉ የሃገር ውስጥ በረራዎች መስተጓጎል ገጥሟቸዋል "- የኢትዮጵያ አየር መንገድ

የኢትዮጵያ አየር መንገድ በኢትዮጵያ በአሁኑ ወቅት ባለው ለበረራ አመቺ ያልሆነ ጭጋጋማ የአየር ፀባይ ምክንያት በርከት ያሉ የሀገር ውስጥ በረራዎች ነሐሴ 13 ቀን 2017 ዓ.ም መስተጓጎል እንደገጠማቸው ባወጣው መግለጫ አሳውቋል።

አየር መንገዱ በዛሬው ዕለትም ተመሳሳይ የአየር ፀባይ በተወሰኑ ጣቢያዎች ላይ ስለተስተዋለ ወደ እነዚህ ጣቢያዎች የሚደረጉ በረራዎች ማድረግ አንዳልተቻለ ገልጿል።

የአየሩ ሁኔታ ሲሻሻል  መደበኛ በረራዎች ወዲያውኑ እንደሚጀመሩ የተገለጸ ሲሆን በዚህ ምክንያት ለተፈጠረው የደንበኞች መጉላላት ደንበኞቹን ይቅርታ ጠይቋል።

@tikvahethiopia

በመብረቅ አደጋ የሁለት ሰዎች ህይወት አልፏል።

ነሀሴ 12/2017 ዓ.ም ከቀኑ 10:00 በትግራይ ምስራቃዊ ዞን ክልተ ኣውላዕሎ ወረዳ ታሕታይ ዓድቕሳንድድ ቀበሌ " ሞፅቖ " በተባለ ልዩ ቦታ ጎድጓዳማና ሀይለኛ ዝናብን ተከትሎ በወደቀው መብረቅ የሁለት ሰው ህይወት ጠፍቷል።

የአከባቢው ተወላጆች ለቲክቫህ ኢትዮጵያ - መቐለ በሰጡት መረባ የመብረቅ አደጋው በእረኝነት ላይ የነበሩ የ13 እና 19 ዓመት ዕድሜ ያላቸው የሁለት ወንዶችን ህይወት ወዲያው አጥፍቷል።

መብረቁ በአከባቢው ባለው ሰፊ ዋሻ ተጠልለው ከነበሩት እንስሳት በ21 ጉዳት አድርሷል።

ከመብረቅ አደጋ ራሳችንን እንዴት መጠበቅ እንችላለን ?

(ተባባሪ ፕሮፌሰር ታደሰ ተረፈ የዘርፉ ተመራማሪ - ለኢቢሲ ተናግረው ከነበረው)

- በዝናብ ወቅት የቤት በርና መስኮትን መዝጋት፣

- ከከፍታ ቦታ መራቅ፣

- በመኪና ውስጥ ከሆኑ ዘጋግቶ መቀመጥ፣

- ሜዳ ላይ ለብቻ አለመገኘት፣

- መብረቅ ወደ የኤክትሪክ ገመድ ገብቶ ተጨማሪ የኤሌክተሪክ ፍሰት በመጨመር ኤሌክትሮኒክስ እቃዎችን ሊያቃጥል ይችላል፡፡ ስለዚህ ሬጉሌተር መግጠም ወይም በመብረቅ ሰዓት ሶኬቶችን መንቀል ያስፈልጋል።

- ህንጻዎች እንዳይመቱ አናታቸው ላይ የብረት ገመድ ተዘርግቶ አንዱን ጫፍ ወደመሬት በመቅበር መከላከል ይቻላል።

ቲክቫህ ኢትዮጵያ
መቐለ
#TikvahEthiopiaFamilyMekelle

@tikvahethiopia