#uchrashuv

Surxondaryolik soliqchilar faoliyati tahlil qilindi

Soliq qo‘mitasi raisi Sherzod Kudbiyev rahbarligida Surxondaryo viloyati soliq xodimlari faoliyati, erishilgan natijalar, yo‘l qo‘yilgan xato va kamchiliklar muhokamasiga bag‘ishlangan yig‘ilish bo‘lib o‘tdi.

Baholash axborot tizimida sohalar bo'yicha tahlil qilinib, har bir yo‘nalish xodimlarning faoliyati samaradorlik ko‘rsatkichlariga ko‘ra muhokama qilindi.

Kameral soliq tekshiruvlari bo‘limi umumiy samaradorlik ko‘rsatkichlari (KPI) bo‘yicha respublikada birinchi o‘rinda ekanligi e’tirof etilib, mazkur yo‘nalishda mehnat qilayotgan xodimlarga minnatdorlik bildirildi.

“Korxonabay” va “mahallabay” ishlash tizimi doirasidagi inspektorlar faoliyati tahlil qilinib, joriy oy, shu bilan birga 2024-yilning so‘nggi oylarida samaradorlik ko‘rsatkichi (KPI) past bo‘lgan xodimlar lavozimidan ozod etildi.

Ilgari xabar qilinganidek , Surxondaryo viloyatidagi 724 ta mahallaga 265 nafar soliq inspektori biriktirilgan. O‘tgan yilning dekabr oyi yakunlariga ko‘ra, ularning o‘rtacha ko‘rsatkichi (KPI) 85,1 ballni tashkil etgan. 105 nafar xodim 90 balldan yuqori natija ko‘rsatgan bo‘lib, shulardan 31 nafari 100 ball olishga erishgan. 29 nafar xodim 75-80 ball orasida, 32 nafari esa 75 balldan past natija ko‘rsatgan.

Shunga ko'ra, zimmasiga yuklatilgan xizmat vazifalarini yetarli darajada bajarmagan, ish faoliyatida xato va kamchiliklarga yo‘l qo‘ygan soliq boshqarmasi boshlig‘i o‘rinbosarlari va boshqarma hamda hududiy soliq inspeksiyalari xodimlariga intizomiy choralar qo‘llanildi.

Soliq to‘lovchilarni ma’murchilik yo‘nalishidagi kamchiliklarni bartaraf etish va “mahallabay” tizimida yuqori samaradorlikni (KPI) ta’minlash bo‘yicha aniq muddatli vazifalar belgilab berildi.

Тelegram |Facebook |Youtube| Instagram |X| Threads