“Jartepa” chegara bojxona postida boshqarma rahbariyati va masʼullari tomonidan profilaktik tadbirlar oʻtkazildi.

Dastlab xodimlarga ijro intizomiga rioya etishlari, yoʻlovchilar bilan xushmuomalada boʻlishlari, bojxona nazoratini amalga oshirishda yuzaga kelayotgan muammolarni bartaraf etish hamda korrupsiya holatlarini oldini olish choralariga eʼtibor qaratildi.

Hozirda mazkur bojxona posti orqali kuniga oʻrtacha 4200-4500 nafar yoʻlovchi va 400-450 ta avtotransport vositalari harakatlanmoqda.

Boshqarma boshligʻi oʻrinbosari B.Zokirov oʻzaro muloqot davomida bojxona nazorati va rasmiylashtiruvini sifatli va tezkor amalga oshirish, fuqarolar bilan muloqotda muomala madaniyatiga qatʼiy rioya etishga doir koʻrsatmalar berdi.

Bundan tashqari, har bir xodimning xizmat faoliyati tahlil qilinib, tanqidiy baho berildi.

Shuningdek, mamlakatimizga kirib kelishi xavfi boʻlgan kontrabanda ashyolari va giyohvandlik moddalarini aniqlashda texnik vositalardan samarali foydalanish toʻgʻrisida ham topshiriqlar berildi.

Respublikamiz bojxonachilari giyohvandlik vositalarining noqonuniy aylanmasiga va muomalasiga doir navbatdagi qonunbuzarlik holatlarini fosh qilishdi.

Joriy yilning avgust-sentyabr oylarida bojxona organlari tomonidan huquqni muhofaza qiluvchi boshqa organlar bilan hamkorlikda o‘tkazilgan ko‘p bosqichli tezkor tadbirlar natijasida 2017 yildan buyon O‘zbekistonda faoliyat yuritib kelayotgan, 4 ming nafar faol obunachisi bo‘lgan “Deadpool” nomli Markaziy Osiyodagi yirik telegram narkodo‘konning yirik tarqatuvchilari qo‘lga olindi.

Jumladan, 2025-yil 31-avgust kuni Andijon viloyati bojxona boshqarmasi tezkor xodimlari tomonidan huquqni muhofaza qiluvchi boshqa organlar xodimlari bilan hamkorlikda Andijon viloyati Xo‘jaobod tumanida o‘tkazilgan tezkor tadbirda qirg‘iz-o‘zbek davlat chegarasida Qirg‘izistondan O‘zbekiston hududiga “Deadpool” narkodo‘kon kuratori “Warren Buffett” topshirig‘iga asosan Qirg‘izistondagi narkodo‘kon ishchisi ombor mudiri tomonidan uloqtirilgan 2 bo‘lakda ko‘k rangli skotchlarga o‘ralgan 602 gramm “alfa-PVP” sintetik giyohvandlik vositasini O‘zbekiston Respublikasi fuqarosi qabul qilib olayotganida qo‘lga olindi.

Surishtiruv davomida ushbu shaxs 2023-yildan buyon narkodo‘kon ishchisi ekanligi, yiliga o‘rtacha 20 kg yoki 100 ming doza, so‘nggi 3 yilda jami 50 kg  yoki 250 ming doza sintetik narkotiklar tarqatganligini maʼlum qilgan.

Bundan tashqari, 2025-yil 10-sentyabr kuni Toshkent viloyati bojxona boshqarmasi tezkor xodimlari tomonidan huquqni muhofaza qiluvchi boshqa organ xodimlari bilan hamkorlikda Zangiota tumanida o‘tkazilgan “nazorat ostida yetkazib berish” tezkor-qidiruv tadbirida 2 nafar fuqarolar “Deadpool” narkodo‘kon kuratori “Warren Buffett” topshirig‘iga asosan Rossiyadagi narkodo‘kon ishchisi ombor mudiri tomonidan berib yuborilgan, muqaddam Toshkent viloyatida joylashgan “Navoiy” chegara bojxona postida aniqlangan akkumulyator ichiga xufiyona yashirilgan 20 dona qora izolentaga o‘ralgan 492,2 gramm “klefedron” sintetik giyohvandlik vositasini qabul qilib olayotganlarida qo‘lga olindi.

Surishtiruv jarayonida ushbu 2 nafar shaxs 6 oydan buyon narkodo‘kon ishchisi ekanliklari, har biri oyiga o‘rtacha 0,5 kg yoki 2,5 ming doza, 6 oyda esa 2,5 kg yoki 12,5 ming doza sintetik narkotiklar tarqatganliklarini maʼlum qilishgan.

Yuqorida ko‘rsatib o‘tilgan yirik tarqatuvchi shaxslarning har birida kamida 10 nafardan ortiq “zakladchiklari” yaʼni mayda tarqatuvchilari bo‘lib, ular tomonidan tarqatish va ko‘mish nuqtalari sifatida Toshkent shahrining Yashnobod, Mirzo Ulug‘bek, Bektemir va Toshkent viloyatining Chirchiq va Yuqorichirchiq tumanlaridagi istirohat bog‘lari va taʼlim muassasalari atroflari tanlab olingan.

Hozirda holat yuzasidan bojxona organlari tomonidan jinoyat ishi qo‘zg‘atildi.