group-telegram.com/uoheebuluu/35120
Last Update:
#УлууКыайыы80сыла
#Көмүскэл
Ыам ыйын 7, 8, 9 күннэригэр Улуу Кыайыы өрөгөйдөөх 80 сыллаах үбүлүөйдээх тэрээһиннэригэр кыттыһан, Үөһээ Бүлүүтээҕи Д. С. Спиридонов аатынан улуустааҕы гимназия үөрэнээччилэрэ учууталларын уонна төрөппүттэрин кытта үөрэ-көтө кэлэн, "Бэллэкэ" маҕаһыын "Үтүө санаа долбууругар" бородуукта уурдулар.
Санатан эттэххэ, "Бэллэкэ" маҕаһыын салайааччыта Спиридонова Л.П. "Үтүө санаа долбуурун" 2017 сылтан үлэлэтэр. Бородууктаны бэйэтэ толорон биэрэрин таһынан, атыылаһааччылар эмиэ уураллар. Ол курдук, күһүн оҕуруоттарын аһыттан, сайын балыктаабыт балыктарыттан аҕалан уурар үтүө санаалаах улууспут олохтоохторо бааллар.
Барыта 1138 киһиэхэ: тыыл бэтэрээннэригэр, доруобуйаларынан хааччахтаах дьоҥҥо, элбэх оҕолоох, кыра дохуоттаах ыалларга "Үтүө санаа долбууруттан" бородууктанан көмө оҥоһулунна. Амарах санаанан салайтаран оҥоһуллубут көмө бородууктаны дьиэҕэ олорор ытык кырдьаҕастарга улуустааҕы социальнай көмүскэл үлэһиттэрэ илдьэн биэрэллэр. Кинилэр үтүө санаалаах дьоммутугар өрүү истиҥ махталларын тиэрдэллэр.
"Үтүө санаа долбууругар" улуустааҕы гимназия учууталлара: Александрова С.Я . (1 "б" кылаас), Перова А.П. (2 "в"кылаас), Слюгрова С.Т. (2 "б"кылаас), Жендринская Н.В. (3 "а" кылаас), Алексеева А.М. (2 "а" кылаас) үөрэнээччилэрин уонна төрөппүттэрин кытта маннык акцияҕа өрүү көхтөөхтүк кытталлар.
Үтүө санаалаах учууталларга, төрөппүттэргэ, оҕолорго ис сүрэхпититтэн махталбытын тиэрдэн туран, куруук дьоҥҥо-сэргэҕэ көмөлөһө туралларыгар, амарах санааларынан бар дьон махталын ыла туралларыгар баҕарабыт!
"Үөһээ Бүлүү" хаһыат
