group-telegram.com/AO_Hududgaztaminot/18709
Last Update:
“Eng yaxshi ilmiy ishlanma” startap loyihalar tanlovining yakuniy bosqichi boʻlib oʻtdi
Yoshlarning ilmiy va innovatsion faoliyatini qoʻllab-quvvatlash, gaz taʼminoti sohasida samaradorlikka erishish hamda startap loyihalarni rivojlantirish maqsadida tashkil etilgan “Eng yaxshi ilmiy ishlanma” startap loyihalar tanlovi oʻz yakuniga yetdi. Natijalar 10 kun muddatda “Hududgaztaʼminot” AJning rasmiy veb-sayti va kanallarida eʼlon qilinadi.
Tanlovning birinchi bosqichida I.Karimov nomidagi Toshkent davlat texnika universiteti, I.M.Gubkin nomidagi Rossiya Davlat neft va gaz universiteti, Toshkent Kimyo texnologiya instituti hamda Qarshi Iqtisodiyot pedagogika universitetining jami 8 nafar talaba va ilmiy xodimlarning ilmiy ishlanma taqdimoti ekspert guruhiga havola etilgan edi.
Joriy yilning 14-yanvar kuni tanlovning yakuniy bosqichida I.Karimov nomidagi Toshkent davlat texnika universiteti hamda Qarshi Iqtisodiyot pedagogika universitetining jami 6 nafar talaba va ilmiy xodimlari tomonidan ilmiy ishlanmalar taqdimoti boʻlib oʻtdi. Unda yosh iqtidorli talabalarning sohada energiya resurslaridan oqilona va samarali foydalanish, xavfsizlik tizimlarini avtomatlashtirish kabi ilmiy ishlanmalari, shuningdek, oliy taʼlim muassasalarining yosh ilmiy xodimlarining ilmiy-texnik asoslangan ishlanmalar taqdimoti bilan tanishildi.
Tadbir soʻngida “Hududgaztaʼminot” AJda tashkil etilgan ekspertlar guruhi tomonidan tanlov ishtirokchilariga bugungi kunda sohada olib borilayotgan innovatsion islohotlar toʻgʻrisida maʼlumotlar berildi hamda tanlov ishtirokchilari qiziqtirgan savollariga javob oldilar.
Bunday ilmiy tadbirlar ilm, fan va ishlab chiqarish jarayonlarini hamohang olib borishga, iqtidorli yosh ilmiy xodimlarni yanada ruhlantirishga, yangicha loyihalar ustida ishlashlariga, shuningdek, mavjud muammolarni ilmiy-texnik asoslangan yechimini topishga, amaliy natijalar va sohada samaradorlikka erishilishiga xizmat qiladi.
“Hududgaztaʼminot” AJ intiluvchan va izlanuvchan talabalar, yosh tadqiqotchi va ilmiy xodimlarni qoʻllab-quvvatlashni maqsad qilgan boʻlib, ilmiy-innovatsion yondashuvlar orqali rivojlanish imkoniyatlarini kengaytirishga doim tayyor. Yangi gʻoyalar, ilm-fan sohasida yutuqlarga erishishni maqsad qilgan yoshlar uchun Jamiyat eshiklari doim ochiq.
Batafsil: https://hududgaz.uz/news?id=13050
