#قصائد_في_خدمة_الخطباء
#مجلس_ليلة_الحادي_عشر
#محرم_١٤٤٧

تصوير شعري...

(طور البحراني/وزن الفايزي)

١/طفله عْلى طفله تْسَنِّدَت والدّمعه بالعين
وحده تصيحن يا بوفاضل واحِدَه حسين
وحده تونّ وتصرخ الأكبر علي وين؟!
ووحده تِنادي إبني جاسم ليش ما رد؟!

٢/أمّا العقيله گِصْدَتِ ابْنُ امها تِريده
گِعدَت تِوِن يمّه وْتِدَوِّر خنصر ايده!
تْگلّه يخويه صعبه هاللّيله وشديده!
لو تگعد وتنظر إلي حيلي ترى انْهَد!

٣/هذا وعد مني إلك يابن الزّچيّه
راح الزم آْنه النّوح الك صُبحِ وْمِسِيَّه
وِبْكل أرُض أوصلها أنصُبلَك عَزِيَّه
واخطُب وَاگول اللّي انْذِبَح مُهجةْ مُحَمَّد!


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#مجلس_ليلة_الحادي_عشر
#محرم_١٤٤٧

شكوى العقيله زينب عليها السلام لأخيها الحسين عليه السلام...

(طور في وينه راسك)

١/خويه البلا ثْگيل
ووحشه ترى الليل
دمعي شِبِه سيل
امْنِ فْراگِ لاحبابْ

٢/إنهض يعبّاس
يالكلّك احساس
خويه ترى النّاس
ما راعت حْجابْ

٣/مْتوني ضْرَبوها
عْيوني سْطَروها
سكنه شْتَموها
يا عُظْمِ لِمْصاب!

٤/بس حن عَلَيَّه
وِالْزَم إدَيَّه
تدري سِبِيَّه
تمشّيني لاجْناب!


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#مجالس_السبي
#صفر_١٤٤٧

لسان حال العقيلة زينب عليها السلام لأبي الفضل العباس عليه السلام في مجلس اللعين يزيد...

(وزن الطويل)

يريتك حاضر وتنظر .. للطشت وتِشوف الراس
وتنظر للّعين يزيد .. يِضُربه گبالي يا عباس

١/عَلَيّه مْصابي كُلّه هان .. ونِسيت السبي وآلامي
من شفت العصا بْإيده .. تنكث ثغرهِ الظّامي
صرت بيديّه لِمْگَيْدات .. أغطي عيون أيتامي
منِ المشهد دِليلي ذاب .. وضاگت روحي والأنفاس

٢/أخونه يا گمر هاشم .. صُبَغ شيبه مَسيل الدّم
وبعده الأثر بجبينه .. جِبينه ذاكه لِتْهَشّم
بعدها مغمّضه عْيونه .. بعده نحره يِتألَّم
اختنگت بعبرتي وونّيت .. وصحت وينك يبو النوماس!

٣/والبيّه ترك حسره .. ولوعه وجرح ما يبره
يِزيد عْلى العرش گاعد .. واخويه حسين عالغبره!
ثلث تيام ظل مطروح .. عاري ومنسحگ صدره!
كل هذا تِحَمّلتَه .. وآنه وحدي بين ارجاس!


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#مجالس_السبي

تصوير شعري...

(وزن الطويل-المسوبع-)

الله يْساعِدَك مولاي .. عْلى همّك يا علي السّجّاد
من طبّيت للمجلس .. مگيود بحبل واصفاد

١/أبد ما غاب عن بالي .. مُصابك سيّدي بالشّام
منّ وْگَفِت بالمجلس .. ويّه النّسوه والأيتام
شْلون تْحَمَّلِت تسمع .. بْزينب تشمت الظّلّام

هذا يْباوع عْليها
وذاكه العَمِد يَاذيها
ويسأل وين واليها

وهيّه تِوِن محتاره .. بين الخدر والأولاد

٢/صدگ يا سيدي گلبك .. تحمّل ألم ما ينقاس
شِهدَت عينك النّسوان .. تِصِد ليهم عُيون النّاس!
وشفت بْطَشِت راس حسين .. وْعصا يْزيد عْلى ذاكه الرّاس

شلون تْحَمَّلِت لِمصاب؟!
شفت فوگ الجبين صْواب
وشفته منسلب لحجاب

وانته العلّه مانِعتَك .. عن دفع الأذى وْلاحقاد

٣/اشْما عيش آنه راح ابقى .. إلك أسچب دموع العين
راح ابچي إلك مره .. ومرّه عْلى الگُمَر وحسين
وانصب مأتم احزاني .. واطلب عالبواچي مْعين

يا مولاي ما عوفه
ذكر عبّاس وچفوفه
ودمعتي دوم مذروفه

لجل لمخدّره الدِّخلَت .. عَلى يْزيد وعَلى بْنِ زْياد


#عظم_الله_أجوركم ◾️


فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#شهادة_الامام_الحسن_المجتبى (ع)


لسان حال سيد الشهداء عليه السلام لأخيه الحسن عليه السلام عند دفنه...

(طور عاري حبيبي عالغبره)

١/نزّلتك بيدي لگبرك
وحاير ظلّيت بأمرك
ثگيله ترى هاي الرّزيّه

خلّيني اسچبها العبره
وأنظرلك آخر نظره
صعبه الأخو يودع أخَيّه!

فراگك يالحسن تدري صعب
يالما كو مثل گلبك گلب
مو بس دمعتي واجب تِصُب
الدنيا مو عجيبه تنگُلُب

الحُسين .. آنه يا روح حسينك
الحُسين .. آنه الشاركته سنينك
الحُسين .. آنه وهسه اسأل وينك؟!

٢/يال بالسّم خلّص عمرك
ما صدّك هذا گبرك
گبالي ولا صدّگ دِفَنْتَك!

دمعي بعيني ما ينشف
وعندي ما ظل حيل اوگف
يالچِنْت الي حْزام وْفُگَدتك!

أوّل كسره هاذي للظَّهَر
وثاني كسره يم شاطي النَّهَر
إنته هسّه وباچر الگُمَر
يحرمني أعز ناسي الدَّهَر

جُروح .. وآلام هْوايه بْگلبي
جُروح .. أحسبها وْيِكبَر تَعْبي
جُروح .. لاهلي وْأحبابي وْصَحبي



#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#الأربعين
#صفر_١٤٤٧

صورة شعرية: لسان حال سكينة بنت الحسين(ع) عند قبر أبيها...

[قصيدة عمودية]

من بعدِ طولِ غِيابِنا والهَجرِ
عُدنا لكي نشتمَّ عطرَ القبرِ

ما أعظم الأشواقَ يا أبتاهُ في
أعماقِنا والمُشتَكى للنَّحرِ

غِبْنا وما غابَ الأسى عنّا وما
غابَت تفاصيلُ البَلا والقَهرِ

جئنا من الشّاماتِ أرضِ مُصابِنا
جئنا بآلامِ النوى والأسرِ

ما زالت الآثارُ فوقَ مُتونِنا
آثارُ ضربِ السَّوْطِ سوطِ الشِّمرِ

يا والدي اْنْهَض إنني أحتاجُ عطفَ
الكفِّ منكَ ودفئ ذاكَ الحِجْرِ

دعني أقبّلُها اليمين وخُذ يدي
بِيَدَيْكَ واجْبُر يا حبيبي كَسْري

يا والدي إنّي عزيزَتُكَ التّي
داوَت جراحَ فؤادِها بالصَّبْرِ

لكنّني ما طابَ لي عَيْشٌ ولن
ألقى سرورا أو هنا في عُمري

يا كلَّ عمري كيف تصفو لي حياةٌ
دون وجهِكَ يا أبي في الدَّهرِ!


#عظم_الله_أجوركم ◾️

فاطمة علي رزق
اسألكم الدعاء

من جوار مولاي مسلم بن عقيل عليه السلام بصوت خادم الحسين عليه السلام الملا عبدالجبار الدرازي

#عظم_الله_اجوركم◾️

ألا إنَّ حِزْبَ اللهِ همُ الغالِبون

#قصائد_في_خدمة_الخطباء
#صفر_١٤٤٧
#الأربعين

لسان حال مولانا زين العابدين عليه السلام لجابر بن عبد الله الأنصاري...

لِزَم إيده ومِشى خُطْوات .. وگله اسْمعني يا جابر
مَصايب راح أرويها .. وكلها تكسر الخاطر

١/أخُوْتي وْكل اهل بيتي .. وكل اصحاب ابويه حسين
شفتهم آنه بالعاشر .. اعْلى هاي الگاع متوذرين
هنا عابس وگع دامي .. وهنا وگع إبن القين
اهناكه مسلم اهنا جون .. إلى أن ما بُقى ناصر

٢/عگب لاصحاب ودّعنه .. منّ هنا علي الأكبر
مشى عنّا ورِجَع لينا .. بْجَنازه وجسمهِ مْوَذَّر
هْنا فوگ الرّمُل جاسم .. أبويه بْحالِتَه تْحيَّر
هْنا جابه لَلِمْخَيَّم .. مَحني وعالألم صابر

٣/هْنا عمّي أبو فاضل .. يجابر وگعَتِ چْفوفه
هْنا راسه بْعَمود انْصاب .. وقّصةْ جوده معروفه!
هْنا بويه انكِسَر ظهره .. وبُقَت دمعاته مذروفه
تالي رد لَلِمخيّم .. مكسور الگلب حاسر

٤/مشى حد ما وصل موضع .. وگف بي وانحنى ظهره
گلّه عمّي يا جابر .. هْنا بويه انگطع نحره!
هْنا خيل العَدو سحگت .. بْحوافرها عَلى صدره
هْنا راسه عْلى راس رْماح .. عيني شافِتَه صاير

٥/ومِنّ هْنا مِشَت زينب .. مسبيّه بلا كافل
هْنا بالسّوط ضربوها .. وصُبَح منها الجسد ناحل
هْنا يا عمّي سلبوها .. هْنا صاحت يبو فاضل
شَعَدّدلك من الآلام .. وكلها صارت بْعاشر!


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#الأربعين

لسان حال مولاتنا العقيلة زينب عليها السلام عند قبر سيد الشهداء صلوات الله وسلامه عليه...

(وزن الطويل)

رِجَعتِ مْن السفر يحسين .. وجبت شوگ الگلب ويّاي
جبت أطفالي والعيله .. وجِبِتلَك يا حبيبي الماي

١/أنا زينب يخو زينب .. الما عافت عَليك النّوح
مشيت بْجسمي لكنّي .. يم جسمك تِرَكت الروح
واليوم رْجَعِت يحسين .. وهذا گلبي كُلّه جْروح
إگعد خلْني أحچيلك .. عنِ السَّوّاه دهري وْياي

٢/حِرَمني دهري من عطفك .. حِرَمني نظرةِ عْيونَك
شنهو الدّنيا والبيها .. يا بو علي من دونك!
گوم اسألني عن حالي .. وخلْني أسألِ شْلونَك
دْروب السبي غَيْرَنّي .. دْروب الما كو بيها فْياي

٣/متني هذا يابن امي .. يشبه صدرك الدامي
جْروح هْوايه شايِلْها .. منّ الضرُب يالظّامي
دَمِعتي حاشى ما نِشْفَت .. ودمع أطفالي وايتامي
يخويه فرگِتَك صعبه .. والگعده عْلى گبرك هاي!

#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#الأربعين

لسان حال مولاتي العقيلة زينب عليها السلام عند قبر مولاي العباس سلام الله عليه...

(طور الخضيب)

١/زينب أنا يا كافِلي إگعد يبو النّوماس
مشتاگه عيني لْشوفِتَك يا خويه يا عبّاس
انْطيني چُفوفَك خلّ اقَبِّلْها واقَبْلِ الرّاس
واشْكيلَك هْموم السَّبي وافعال ذيچ النّاس

٢/مسبيه جيتك والحزن يا خويه غيّرني
ما أدري اْنا عْلى فْراگك الگاسي شْيِصَبّرني
حيّرني حالك بالگبر يا خويه حيّرني
لا ما كسرني مْصابي بس انته اللّي كاسرني!

٣/مِن هالأرُض تدري يبو فاضل صَعُب ممشاي
شْلون ارجع لأرض المدينه وإنته مو وَيّاي؟!
لو عنّك النّاس سْألوني صعبه تدري هْواي
مدري شَجاوب والألم فَتَّت يخويه حْشاي

٤/هاي اوّل زْياره إلي لْگبرك ينور العين
وآخر زِياره وبيها اودعك والدمع صوبين
ما راح ارد لو عفتك اليوم وعفت لحسين!
لكن وعد دوم ابچي ليكم وَيّه أمْ لِبْنين



#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#الأربعين

تصوير شعري: كأني بزينب عليها السلام تروي المصائب لكافلها أبي الفضل العباس سلام الله عليه عند قبره الشريف...

(طور الجفيري)

١/يا خويه هذا اللّي جرى
لحسين حزَّوا منحره
واضلاعه كلها مْكسّره
مِن فِعلَةِ خْيول العِدَه

٢/يا با الفضل عُگْبِ الذَّبِح
راسه ارتِفَع فوگ الرُّمِح
بِجْبينه بيّنلي الجَرِح
بٌراس الرُّمِح واضح بِدَه

٣/منّ ارتِفَع فوگ القَناةْ
شِفْتِ الشِّفاهِ الذّابِلاتْ
وْشِفْتِ العُيونِ الغائراتْ
عْلى مْصابَه عيني شاهِدَه

٤/مِن بَعده هِجْمَوْا عالخِيَم
وحلّ الألَم بَعْدِ الألَم
صِرْت اجمَع اطفالِ وْحَرَم
ونار الشِّمِر مِتْوَقِّدَه


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#الأربعين

لسان حال مولاتي سكينة بنت الحسين(ع) عند قبر أبيها...

بويه مشتاگتلك آنه .. گلبي منّ الفرگه ذاب
گوم ضمني تدري بيّه .. بْحُضْنَك انسى كل عَذاب

١/سِكنه آنه الدَّلَّلِتها .. وهسّه محرومه الدّلال
بعدك مْتوني ضْرَبوها .. والظَّهَر يا بويه مال
وجهي بِغْيابَك تِغَيَّر .. وْدَمعي منّ عْيوني سال
عوف گبرَك عود اليّه .. مو إلَك نوم التُّراب!

٢/رايِدَه عن حالَك اسأل .. والجَواب ادري صَعُب
مِنِ العاشِر ظامي بَعدَك .. الماي ما روّه الگَلُب؟!
نحرك شْلونه يغالي .. بعده منّه الدم يِصُب؟!
شْلونها أضلاع صدرك؟! .. آه يا عُظْمِ المُصاب

٣/مدري لو لارض المَدينه .. رِجَع يا بويه الظَّعَن
شْلون نِدخِلها بِدونَك .. يا حبيب امّ الحَسَن؟!
صار من بعدك وطنّا .. أرُض غُربَه مو وَطَن
آهْ يا ضيعَةْ شَمِلْنا .. من بعد كل غالي غاب


#عظم_الله_أجوركم ◾️

فاطمة علي رزق
اسألكم الدعاء

https://youtu.be/wuQ1mnPQeyg?si=8UN1nHXwaCEOskNf

الرادود يوسف سعد العاملي
كلمات فاطمة رزق

#نسألكم_الدعاء

#قصائد_في_خدمة_الخطباء
#صفر_١٤٤٧
#شهادة_الامام_الحسن_المجتبى (ع)

لسان حال مولاتي زينب (ع) عند وداع مولاي الامام الحسن المجتبى (ع) وهو على فراش الشهادة...

[قصيدة عمودية]

فِراقُكَ في فؤادي كالسِّهامِ
فدونَك ليتني ألقى حِمامي

أذابَت مُقلَتَيَّ دموعُ حُزني
وما يُجدي البُكا يابنَ الكِرامِ!

يعزُّ عليَّ أن أرثيكَ فوق ال
فِراش بِعَبرَتي لا بالكَلامِ

طريحَ الجسمِ قد جُرِّعتَ سُمًّا
شديدًا والمَواجِعُ في احتِدامِ

أخي يا ليتَ عُمرَ الأُختِ يُهدى
لِأُهديهِ وذا كلُّ المَرامِ

حبيبي سوف تمضي عن عُيوني
فبلّغ أمّيَ الزّهرا سلامي

وأخبرها بأنّ يدَ البلايا
تُعِدُّ ليَ الأشدَّ على الدّوامِ

أنادي والنّدا يُدمي فؤادي
وداعًا يا أخي بل يا إمامي

وداعًا يا حبيبَ الرّوحِ هذا
وداعٌ منهُ صار الجفنُ دامِ

سأبكي ما حييتُ على كريمٍ
يُشالُ اليومَ في نعشٍ أمامي


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#شهادة_الامام_الحسن_المجتبى (ع)

لسان حال العقيلة زينب (ع) لأخيها الامام الحسن (ع)....

(طور ودعتك وظهري انكسر/ طور الجزع)

١/شِفتَك طَريح وْمالت مْتوني
لونَك تِغَيَّر وانخُطَف لوني
وين اليِألْمَك يا ضوا عْيوني
يَماي العين!

٢/أسمع وِنينَك واندب وْأنحَب
تتعذّب وْوَيّاك انه اتْعَذَّب
يا روحي يال مِن كلشي لي أقرب
يَكِل لِسْنين

٣/عن خدّي إمسَح بيدَك العَبره
وْخلّيني اضمّك يالحسن مرّه
گلبي عَلى فْراگك شِنو يْصَبْرَه
شْيِصَبْرِ حْسين!

٤/غالي يبو مْحمَّد عَلَيْ غالي
لو تمشي عنّي يختلف حالي
ريت آنه ألگى بْدونَك آجالي
فِجَعني البين


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#صفر_١٤٤٧
#شهادة_الامام_الحسن_المجتبى (ع)

صورة شعرية: كأني بمولاتي زينب عليها السلام تقف عند باب الدار، وإذا بأخيها الحسين(ع) قد أقبل من البعيد بعد أن انتهى من دفن أخيه الحسن(ع)، فرأته محنيّ الظهر، مكفكفًا دموعه بيديه والعباس(ع) إلى جانبه كلّما مال ظهر الحسين(ع) سنّدهُ إليه، نظرت الى هذا المشهد فتمثّل أمامها مشهد آخر وهي العالمة غير المعلمة، فقالت مخاطبةً الحسين (ع)...

راجِع اليوم وْعَضيدَك .. يمشي يَمَّك يا حُسين
شْلونِ اذا تِرجَعلي باچر .. وَحدَك بْلايه مُعين؟!

١/يْسِنْدَكِ العَبّاس اشوفه .. هَسَّه لو جدمك عِثَر
خايفة آنه بْيوم عاشر .. تْرِدْلي مكسور الظَّهَر!
شْلون لو گتلي بو فاضل .. ظل يزينب عالنّهر!
شلون لو گتلي اگْطَعوها .. چْفوفه وانْشَگّ الجبين!

٢/هذا يا خويه عٌلى إيدك .. تْراب من گبر الحسن
يعني بچفوفَك أخَيَّك .. مْعَزَّر بْگبره انْدِفَن
گلّي منهو اللّي يِلِفَّك .. ظُهُر عاشر بالچفن؟!
خويه منهو اللي يِدِفنَك .. لو تِظَل مرمي وطعين؟!

٣/الحسن فوگ فْراشه شفته .. جسمه ما كو بي جَرِح
نحره سالم لا هو دامي .. وْلا هُوْ راسه عْلى الرُّمِح
شلون أصبر لو گصدلَك .. إبن جَوْشن للذَّبِح؟!
صعبه يا خويه أشوفَك .. دامي مگطوع الوتين!!


#عظم_الله_أجوركم ◾️

فاطمة علي رزق
اسألكم الدعاء

#قصائد_في_خدمة_الخطباء
#محرم_١٤٤٧

لسان حال العقيلة زينب(ع) لجدها رسول الله(ص) عند جسد المولى صلوات الله وسلامه عليه...

گوم شوف الحال هذا بْعينك
يا رسول الله ذَبيح حسينك

١/بْخيمِتي چِنْت وْسِمَعْتِ وْنينه!
وِطْلَعِت مَذهوله ادَوِّر وينه
وصّلت للمصرع وْيه سْكينه
شفت اخويه بالدّمه مْخضبينه!

وْتينه هذا لو خضيب وْتينك
يا رسول الله ذَبيح حسينك

٢/انْچتل بالمصرع يجدي ظامي
وارتفع برماح راسه الدّامي
جيت اغسله بدمعي هذا الهامي
تالي بِالخيل انسِحَگ جِدّامي

عالأرض چنّ انته لِمْخلّينك
يا رسول الله ذَبيح حسينك


#عظم_الله_أجوركم ◾️

فاطمة علي رزق
اسألكم الدعاء