ركضت خيل . صوب الخيم . طلعت حرم . خايفه ومفجوعه رحت

اطفال اهواي . وانه مره . متحيره . بهالحيره چم موته متت

صار الصار .. وهل عفت اخوي بنينوه
صار الصار .. بلكوه اجرنه الهوه
صار الصار .. طاحن خيمنه واللوه

امنياتي بس اشوف .. خواني بالخيم
ياهلي رحتو وين .. وكلشي ما سلم

حسين يا خويه

"""""""""""""

خوف وشوگ . ياحيرتي . من طلعتي .. ومغورگ بعيني الدمع

اركض ليك . چا بالخيم. مامش علم .. مدري الكفلنه بيا وضع

ها يحسين.. هسه انطي وجهي لياكتر
ها يحسين.. اركض الك راح الستر
ها يحسين.. وللخيمه متعني الشمر

حاچيني راح اموت .. للخيمه لو الك
بلخيمه لو بقيت .. تبقه انته وحدك

حسين ياخويه

،،،،،،،،،،،،

جيت عليك . ياكل هلي . اشر الي .
من الخيل كلشي ما شفت

هنه هواي . مالحگت . وانته ضعت . يابعد حيل اختك طحت

ها يام عون.. كثرت على حسين العده
ها يام عون.. عشره واخوج لوحده
ها يام عون.. لحگي سحكهن مابده

خافن الحافر يدوس .. وحسينج الحدر
دخلي بين الخيول .. لاضلعه ينكسر

حسين ياخويه

،،،،،،،،،،،،،،

ذيج خيام. كلها ترى. متنطرى.
وانا ادري عنك انسأل

انطيني جواب. اشد ياجرح. لو تنذبح. لوگلهم ابن امي عدل

لو رديت.. من دونك امشي لوحدي
لو رديت.. بيا دمعه ابچي بيا حدي
لو رديت.. وصاحت رقيه والدي

عمه رقيه ابوج .. ياعمه منذيح
بس ساعه ما تطول .. ونشوفه عالرمح

حسين ياخويه
,,,,,,,,,,,,,,
محمد عيسى المنصوري

راح الولد راااح. راح الولد رااح

خويه يازينب تعالي
خويه گومي فزعي ليه
ذبحو ابني فوگ صدري
وهذا دم ابني العليه
دم علي مانشف بعده
انذبح عبدالله على اديه
وصلي المذبوح لأمه
والله ماضل حيل بيه

ازغير عمره شهور بس معدودات
وشفافه من گد العطش متفطرات
گلتلهم ابني بيا ذنب يعطش هيچ
صابه السهم مالحگ يشبگني ومات

راح الولد راااح. راح الولد راااح
………..
گاعده بخيمتها تبچي
تدعي ودموع على خدها
ربي كون يدر حليبي
وعازت ابني ربي اسدها
ربي ابني شهور عمره
والعطش چبده مردها
تبچي بالخيمه الغريبه
مادرت ذبحو ولدها

من گد بچيها ما بقى عليها عيون
والله انته وابنك ياحسين تحيرون
خويه الرباب اتاني تشبگ هالولد
وشلون اگلها مات عبدالله شلون

رااح الولد رااح. رااح الولد رااح
……….
غطته عمته بعباها
گلب عمه وگلب والد
وگفو گبال الرباب
واحد اتچه على واحد
گولو ابنچ شرب ماي
هسه گلب وليدي بارد
ليش غطته العبايه
فدوه گولو وليدي گاعد

ماشرب ماي اليوم ثالث متعوب
هسه غفه شتاگيتله شيلي الثوب
مخموش گلبي دموعكم مال فراگ
عبدالله غير العطش بيمن مصيوب

رااح الولد رااح. رااح الولد رااح
………..
صار عبدالله بحضنها
ميت ورادت تشمه
تصيح مدري شلون ابوسه
خاف ابوس وخاف الچمه
ميت وجابوك ليه
هاي ياعبد الله نعمه
يعين گلبي شلون باجر
حسين من الخيل المه

ياويل گلب امك عليكم يا ويل
باچر حسين تفرهد بطوله الخيل
وباچر خواتك بالركض مچويات
يفراگ الحسين شكثر رايد حيل

راح الولد راااح. راح الولد رااح

……..
محمد عيسى المنصوري

طلعونه والشمس شافتنه
امن الهضم والشوك والهم متنه. خويه حسين
ضاكت الدنيا علينه ودارت
والعقيله من بعدكم حارت. خويه حسين

يفت الچبد صوت العلاوي
فوكاكم يصير النعاوي
من المصايب حيلي خاوي
والليل ما مرني بسلامه

اجتنه الخيل والخيمه صفت حمره
ومابين الحرم طلعت مره وحره
وصعدت على التل وشافت الكسره

ماتت قهر من شافت الحال
ابن امها نايم فوك الرمال
جتال نوم الغبره جتال
____
امعصبه وحيلي خوه وما بيه
متغيره ما جني صدك علويه. خويه حسين
انه زينب ياهي مثلي وحالي
يصير اسمي ينحجي جتالي
خويه حسين

ما بين الخيام وحبالي
محتاره المن انطي بالي
غالي الخدر وحسين غالي
المن اروح احتارن هواي

بكينه ابلا ولي واتعنت الخيل
يا هاشم تراني تمرمرت حيل
جرعنه الغربه والهيمه ومشي الليل

مكسوره مكسوره العقيله
وويله الجدم باجر يويله
يركبونه عالناكه الهزيله
____
يا حرامات الوكت خاناني
احتركت الخيمه وطلع عنواني. خويه حسين
بله شيفيد البجي والصايح
والجدم لديار غربه رايح.
خويه حسين

يلموتاك الماي يا ماي
لنعاك نعيي الفاجد الراي
امصابي زغير وهجرك هواي
خلاني الوب ومرمراني

خذاني الشيب وبيضت تره عيوني
من دونك اروح وتضل من دوني
لو يمك اموت هواي خيعوني

لو يمك وضماني التراب
ولا عالهزل يحديني سلاب
مهضومه احجي مامش عتاب
___
نكطع هرش الكلب ونهد حيلي
وما اوجد لا نهاري وليلي.
خويه حسين
تعبتني وهجرك الهداني
والتون فوك الهزل مو اني.
خويه حسين

مو. انه التروح برخيه
مو انه التسمه سبيه
بس الوكت داير عليه
وطلع خيالي بوسط غربه

وكتي ما نصفني ولا رحم كبري
تعب انه جبتها من زغر عمري
وازاني على اخواني وعلى خدري

وازاني دهري وضيعاني
وبمصاب اخوتي مرمراني
ما انتضر. يهلي شتاني
———
محمد عيسى المنصوري

مشايه مشايه اجينه لكربله
نتعنه مذبوح نواسي العايله
يخوات الحسين يمشوها بشمس
نگصدله حفاي نماشي القافله

اهلي الك جابوني. وللمشي نذروني
وخلها تاكلني شمس. فدوه الك يعيوني
——-
يستاهل حسين نخلصله عمر
مابين الينوح والييدك الصدر
تلطم على الراس على الخد فاطمه
وعليك الخدود اسويهن حمر

انته اكبر من عشگ والصدگ هذا الصدگ
عيوني اخلصه سطر. اله اسويهن زرگ
——-
ضعنك يرد ليك بتراب العبي
مطلبي مهضوم اجيلك مطلبي
كشختي بالطين والخدود الزگ
واليلفي كشاخ ماعاش السبي

اه يمسلوب الهدم. كون اجيك بلا اسم
اوصل وبهدومي طين. حته اواسيك بفهم
——-
طلعنه من ماي وجينه لكوثرك
مولاي يحسين وحگك نعشگك
تتعب الرجلين يمحلات الزحف
لو بلدرب موت اموت وأوصلك

حته لو موت الدرب. من بعد لو من قرب
انته يا احله جرح. انت امام وانته حب
——-
محمد عيسى المنصوري

يبو حسين = يا مدرك الجان
يبو حسين = قائد يسلطان
يبو حسين = للجنه بيبان

يا مدرك الجان = بالازمان = والدنيا = علي
يا شاطر الموت = يبو تراب = يا حيدر = علي
نور البراهين = والافلاك = تسري بيا علي

حق حق حق = ملك صبح = ونتبعه خدام
حق حق حق = شيخ السمه = يا صوت الاحلام
========
علم بيك = موسوعه واكتاب
علم بيك = يا شالع الباب
علم بيك = منه الكمر غاب

موسوعه واكتاب = قواميس = ما تكفي = لعلي
مفتاح الاجنان = يمنان = يا واهب = علي
يا اول الكون = والعيون = مخلوقه = لعلي

حق حق حق = دين الخلك = يمأسس الدين
حق حق حق = ماهو بشر = وماهوه من طين
========
علي يا = هادم الاشراك
علي يا = مهبت الاملاك
علي يا = الله من سواك

خالق الكوان = ولديان = يا مخلق =علي
بيك الله ينشاف = بلا اوصاف = من نورك = علي
فاتحها البواب = ولكتاب = بجفينك = ياعلي

حق حق حق = علي علي = يابو الوفاي
حق حق حق = علي علي = ها يبو التراب
========
يبو تراب = هادم للاصنام
يبو تراب = امسمينه ابو الثام
يبو تراب = للكوفه ضرغام

للكوفه ضرغام = يبو الثام = يا دايم = علي
باب القرائين = والامعين = للوادم = علي
يا والد حسين = يضهضاب = بالملگه = علي

حق حق حق = سيد البشر = وبيده العناوين
حق حق حق = سورة فلق = ويا آل يا سين
========
محمد عيسى المنصوري

خويه الكيتك
دم بلحيتك
طولك تفرهد ،  يخويه يخويه
سلبو ثيابه
بحر الترابه
الله الاحد ،   يخويه يخويه

موتني شوكه ، اخته ونعه فوكه
اخوي وتعب حياتي ضامي رميه

مبجي السمه دم ، وطولك تثلم
شلون امشي خويه وماعندي رايه
،،،،،،،،،،،
چا وين اضمك
يالماكو هدمك
ودمعاتي تجري ،   يخويه يخويه
ياهو اليعينك
يجرح ونينك
وجرحي على كبري ،  يخويه يخويه

دمعاتي تجري ، ولطمي على صدري
دلالي خويه صعبه ياهو اليعينك

ادري بحسرتك ، وعينك على اختك
ثوبي احترك يخويه وسمع ونينك
،،،،،،،،،،،،،
لشام خذوني
خويه عذبوني 
تاليه ويه غربه ،   يخويه يخويه
دخلوني ديوان
وكل ضعني نسوان
تدريه صعبه ،   يخويه يخويه

محد فزعلي. حاچوني يهلي
وانه الذبح اخوتي يضحك عليه

دمعي نزل دم. وحيلي تثلم
من شفت السياط تصب فوك رقيه

،،،،،،،،،،،،
راسك اجانه
وزيد عزانه
وركضت رقيه. يخويه يخويه
شفناها نامت
ماندري ماتت
عليهه شبديه. يخويه يخويه

ليل اليمرني ، اكضي مدامع
ضعني علا هزله يبن امي طالع

احجيلك اني ، هاي الاذيه
لتبقه غريبه تبقه تنازع
،،،،،،،،،،،،،،
محمد عيسى المنصوري

حسين نايم بقه ومابيده كل حيله
يصرخ ويلي جتني الخيل ياليله
واخته من المخيم غاد توميله


عفت الشمر بحسين يرفس
نــايـم اخـيـي ضـل بـلاحــس
من منحرة ضل صوته يهمس
وصوت الحوافر حيل يخلس


يمه الاخو يمة
فوگ الرمح راسه
تدمع بقت عينه
والينه والينه
هدو تره علينه
—-
اه يبن امي اجت خياله لخيامي
كوم افزعلي ماضل للخدر حامي
ماي اعيوني اشرب منها ياضامي

يالما الك ناصر يعينك
انه اختك انطيني يمينك
كواك الله لكثر الجروح
تشاهد ركضتي ويلي عينك

يمه الاخو يمه
طايح على الغبره
وعينه تصد خدره
فرينه بالهيمه
وردنه ولو كطره
___
شلون الصحره توالم خدري يبن امي
وصعبه الغيرك اسولف يلاخو همي
ومن كد خوفي نشف من خوفي كل دمي

شلون الاخت تكدر تكابر
تشاهد اخوها بنص حوافر
وهيه ركضها كبال العيون
وميصح ولي ولاكو مناصر

يمه الاخو يمه
يبن امي لو تدري
محد رحم كبري
خسمين أنه عمري
والركضه مو كدري
____
جابوها النوك وصعدتها شكثر زحمه
ومسبيه انه اذا ما تنهض اتسمه
انته الرحمه بخيل انداست الرحمه

شنهي الجره وتتركني وحدي
لا ناصر ولا خوه عندي
مو جنت روحك انه زينب
تاليها دنيا تصير ضدي

يمه الاخو يمه
ماضلت اخيامي
لمن رحت ضامي
للكوفه مشوني
لا والي لا حامي
____
لدروب الشام خذوني والدرب هيمه
ماعندي خوان ولا كفال لا خيمه
شيمه من وين اجيبن للفكد شيمه

جرة النفس ثكلت عليه
من صاحو اعليه السبيه
صعبه تره كلمة غريبه
وفوكاها صاحو خارجيه

يمه الاخو يمه
شلون اقبل بهايه
ادخل بلا رايه
للشام اجي وحدي
والغربه حدايه
—-

محمد عيسى المنصوري

حرام أقرالك ومرتاح بالي
وما فاكد اهاليتي وغوالي
ليش بعاشرك تلكاني محزون
ومو يم الجرح باقي الليالي

اسف .. كتلهه هواي مو كافي
اسف .. ملت من وره شفافي
هايه .. اخر جيه بذنوبي
اسف .. هدلن منهن اجتافي

ابجي امن الذنب ماباجي للغربه
وما اندل طريقك اله بالصعبه
يالمهدي بمتاهاتي ضعت انه
أنه الكلما كبر عمره كبر ذنبه
____
أنه الشايل اسمكم فوك زندي
بس ماكو حدر كلبي يمهدي
انه لو صدك مولاي احبك
جا كل خطوه احسك تمشي سدي

الدمعه .. احس الطافك وياهه
الدمعه .. تسوه الدنيا مجراهه
الغربه .. وين تروح مو وياك؟
الدمعه .. هم وياك تلكاهه

الدنيا واللي بيها وكل اطايبها
وي دمعة غربتك ما اكلبها
روحي انطيك ياهه وماي اسويهه
وفوك خيام اهلك سيدي ذبها
___
كاضيها اعتذار ومالي قيمه
يمته احترك وي حركة الخيمه
كلبي ريته يتحفه ويطب عالنار
ويدوس الجمر مثل اليتيمه

اتمنه .. اثبت موقف وياكم
اتمنه .. اعيشن غايتي ارضاكم
تفرح؟ .. افرح. تبجي انه ابجي
اتمنه .. ابجي ويه مجاكم

للماعنده ناصر حاير بعيله
اكضيله حياتي وحيلي اكضيله
ودع اخته بدموعه ووكع تالي
اويه الوكعه عدوه اتعنه اله بخيله
___
يمنهوب بعيالك شرد اكلك
صعبه وتدري فوك الهزله اهلك
صعب مستصعب وما الك تفسير
واصعب شي عليه هوه سهلك

وينك .. كوم وسل فقار الدم
وينك .. حركوه تره المخيم
ويلي .. عمتك طبت اعله الشام
وينك .. صعبه اعليك ماترهم

سل بتارك ورجع عقيلتكم
ماتت بين ودام موش وادمكم
من دار الكرم تهدى لشرِ الدار
الله يا مصيبتها غريبتكم
__

محمد عيسى المنصوري

رديت خويه وطال الغياب
جيت بعبايه تنكت تراب
محد يگل ام عون حياچ
وي الذبيح شلون العتاب

المن عتبنه. يهل المحنه
هسه انه زلمه اريده يردنه لوطنه

حاچيني يحسين. بس النساوين
خويه الكسر گلبنه ما رف علمنه
…..
نسوان خويه بقينه نسوان
يافشلة الما عندها خوان
لو سوط طگها تروح ياصوب
ومنين ما اتندار عدوان

حيرتنه حيره. وين العشيره
محد فزع لختكم وانه الچبيره

يهل الحميه. راحت رقيه
وحدها بالخرابه تخاف الزغيره

…..
من الوجع مدري شكضن
يوجعني متني وهنه ركضن
متطشرات الركضن بخوف
واليمي بس نسوان يبچن

ماعدنه رايه. بس العبايه
محد يفز يگلهم ذن مو سبايه

منگد ركضنه. خويه فحطنه
وبهذا عمري واركض هم حاله هايه
…..
وشلو افسر ركضة الخوف
ماشوف من جفاك ماشوف
بنات الهواشم تارسه الگاع
وچبير الهواشم وحده معيوف

بالركضه ونوح. ويلي يمذبوح
ياعمت عيني على اخونه الذبحه مگلوب

ماعندك فياي. متطشر هواي
من كل مكان اشمك ركضتنه يا صوب
…..
محمد عيسى المنصوري