group-telegram.com/oliymahad/37392
Last Update:
#Rasmiy_munosabat
⚡️ Internet tarmog‘ida xorijda go‘yoki “rasmiy diniy ta’lim” olish haqidagi e’lonlarga MUNOSABAT
💻 So‘nggi vaqtlarda ayrim shaxslar tomonidan ijtimoiy tarmoqlarda fuqarolarimizni diniy ta’lim olish uchun chet elga chaqirish holatlari kuzatilmoqda.
📲 Xususan, Misr, Turkiya, Saudiya Arabistoni kabi mamlakatlardagi diniy ta’lim muassasalariga o‘qishga borishga da’vat etuvchi chaqiriqlar va reklama e’lonlari keng tarqatilayotganini ko‘rish mumkin.
❌ Ushbu e’lonlarda ta’lim maskanlari go‘yoki “qonuniy” yoki “rasmiy” sifatida ko‘rsatilsa-da, amalda ular O‘zbekiston Respublikasi tegishli idoralari tomonidan tan olinmagan hamda o‘sha mamlakatlardagi noqonuniy yoki ruxsatsiz faoliyat yurituvchi o‘quv markazlari hisoblanadi. Bu o‘rinda “rasmiy diniy ta’lim” iborasidan asosan ko‘proq talabgorlarni jalb etish maqsadida foydalanilmoqda.
❗️ Xavotirli jihati shundaki, bunday chaqiriqlar, ko‘pincha, diniy aqidaparastlik va mutaassiblik g‘oyalarini singdirish, yoshlarimizni noto‘g‘ri yo‘lga boshlash va ularning dunyoqarashiga salbiy ta’sir ko‘rsatish xavfini o‘zida mujassam etadi.
‼️ Shu sababli, ota-onalar farzandlarining kimlar bilan muloqot qilayotganiga, internetda qanday ma’lumotlarni o‘qiyotganiga va qanday takliflarga javob berayotganiga e’tiborli bo‘lishlari shart!✅ Shundan kelib chiqib, fuqarolarga rasmiy diniy ta’lim faqatgina O‘zbekiston musulmonlari idorasi tizimdagi ta’lim muassasalarida berilishi, turli shaxslarning targ‘ibotiga uchmaslikni eslatgan holda, diniy bilimlarni o‘rganishga bo‘lgan ehtiyojlarini ushbu ta’lim muassasalari imkoniyatlari orqali qondirishni tavsiya etib qolamiz.
🔰 Hozirda O‘zbekiston musulmonlari idorasi tasarrufida 4 ta oliy va 10 ta o‘rta maxsus islom ta’lim muassasalari faoliyat ko‘rsatib kelmoqda. Shu bilan birga, 2018-yildan buyon hududlardagi 28 ta “Qur’on va tajvid” kurslarida 77 mingga yaqin fuqaro ta’lim oldi.
📱 Diniy idoraning “muslim.tv” internet platformasida barcha yosh toifalari uchun mo‘ljallangan onlayn Qur’oni tajvidi darslari tashkil etilgan.
❓Shu o‘rnida ta’kidlash lozimki, xorijiy diniy ta’lim muassasalari diplomlari O‘zbekiston hududida diniy sohada faoliyat yuritish uchun asos bo‘lmasligi, ta’limdan so‘ng ishga joylashishda noqulayliklar keltirib chiqarishi mumkinligini eslatib o‘tamiz.
📌 Aziz ota-onalar! Farzandingiz taqdiriga befarq bo‘lmang. Ularga ma’naviy sog‘lom muhitda, mamlakatimizda mavjud xavfsiz ta’lim maskanlarida ilm-u ma’rifat berish — farzandlar kelajagini asrashning eng to‘g‘ri va ishonchli yo‘lidir!
🌐
Din ishlari boʻyicha qoʻmita Axborot xizmati