group-telegram.com/sargydaevstepan/8239
Last Update:
Ытыктабыллаах Евгений Николаевиһы, Дьокуускай куорат бары олохтоохторун, киин куоракка олохтоох Чурапчыттан төрүттээх дьоммутун Улуу Кыайыы 80 сылыгар, Арассыыйаҕа - Аҕа дойдуну көмүскээччи, Саха сиригэр - Ийэ дойдуну көмүскээччи сылларыгар аналлаах Улуу Туймаада Үрүҥ Тунах Ыһыаҕынан быйыл тэриллибитэ 95 сылын бэлиэтиир Чурапчы улууһун олохтоохторун уонна тус бэйэм ааппыттан итиитик, истиҥник эҕэрдэлиибин!
Бу бэлиэ сылларга сөп түбэһиннэрэн Чурапчы сириттэн Улуу сэриигэ аттаммыт Сталинград иһин кыырыктаах кыргыһыыга хорсун быһыытынан норуот Геройун аатын сүкпүт аатырбыт артиллерист Гавриил Протодьяконовка Дьокуускай куоракка Кыайыы пааркатыгар норуот күүһүнэн хомуллубут үбүнэн тутуллубут пааматынньыгы куорат салалтатын, дьаһалтатын күүстээх өйөбүлүнэн Кыайыы күнүн көрсө үөрүүлээх быһыыга-майгыга туруоруубут – үйэлээх өйдөбүл, билинии уонна сүгүрүйүү үрдүк бэлиэтинэн буолар! Дириҥ суолталаах Ытык ыһыах күнүгэр Аҕа дойду Улуу сэриитин кэмигэр уоттаах сэриигэ, Хоту көһөрүллүүгэ, күүстээх үлэҕэ тыылга эрэйи-муҥу эҥэрдэринэн тыырбыт бары дьоммутун ахтан-санаан ааһабыт, кинилэр үрдүк ааттарыгар сүгүрүйэбит, аныгы сайдыылаах ыччаппыт кэскилин кэрэһилиибит! Анал байыаннай дьайыыга кытта сылдьар хорсун буойуттарбытыгар кыайыы-хотуу аргыстаах төрөөбүт дойдуларыгар эргиллэн кэлэллэригэр баҕарабыт. Ким да умнуллубат, туох да умнуллубат!
Бүгүн күөх дуолга үктэниибитин уруйдаан, ыллаан-туойан, саха сөбүлүүр оонньууларынан күрэхтэһэн, ирэ-хоро сэһэргэһэн, өбүгэ ситимин, сиэрин-туомун тутуһан ыһыах алгыһын ылыыбыт – бүгүҥҥү дьоро күн төгүрүк сыл уста барыбытын арчылыыр-абырыыр ис кистэлэҥ күүһүнэн аны да кэлэр кэмнэргэ буола туруохтун!
Ытык Туймаада ыһыаҕар 15 дэлэгээссийэ састаабыгар ыаллыы куораттар уонна эрэгийиэннэр бэрэстэбиитэллэрэ, ол иһигэр Благовещенскай, Соҕуруу Сахалинскай, Горнай-Алтайскай, ону тэҥэ Донецкай Норуодунай Өрөспүүбүлүкэ уонна Кытай бэрэстэбиитэллэрэ ыалдьыттааһыннара - Сахабыт сирин киин куората доҕордуу сыһыана сайда, хардарыта бииргэ үлэлээһинэ кэҥии турарын кэрэһилиир.
Улуу Туймаада ыһыаҕа мэлдьитин бу курдук ил-эйэ, доҕордоһуу туоната, түмсүү түһүлгэтэ буолан, олоххо тирэхтээхпитин, инникигэ эрэллээхпитин кэрэһилээтин, бар дьоммут күүһэ-кыаҕа кэҥии-кэтирии турдун, кэнчээри ыччаппыт ситиһиилээх, дьулуурдаах, инникигэ эрэллээх буоллун! Бука барыгытыгар дьоллоох олоҕу, уйгулаах сайыны, эйэлээх халлааны, этэҥҥэ буолууну баҕарабын!
Уруй! Туску!
BY СТЕПАН САРГЫДАЕВ
Share with your friend now:
group-telegram.com/sargydaevstepan/8239