group-telegram.com/uoheebuluu/32061
Last Update:
#отчуот
Ааспыт сыллааҕы отчуот кэмигэр туруорсубут, этиммит боппуруостарынан үлэ хайа таһымҥа тиийбитин нэһилиэк баһылыга Анатолий Антонов сиһилии быһаарда. Ол курдук, 120 уонна 70 миэстэлээх оскуола-оҕо саадын дьиэтин тутуута оннуттан хамсаан, этэҥҥэ тутуллан киирэрин долгуйа кэтэһэллэр. Муниципальнай баһаарынай чаас арыллан 5 киһи үлэлэммитин ыйда. Федеральнай суолу асфаллааһын боппуруоһа быйылгы боротокуолга эмиэ киллэрилиннэ. Сотору кэминэн быһаарылларыгар эрэнэрин биллэрдэ. Ол оннугар нэһилиэк иһинээҕи икки уулусса асфалланар буолбутун үөрэн туран иһитиннэрдэ.
Олохтоохтор ааттарыттан 2030 сылга бырагыраамаҕа киирбит модульнай балыыһа тутуутун ыйытта. Маҥааска, Кырыкыйга, Сургуулукка киирбитэ, оттон Ороһуга 2030 сылга былаан быһыытынан киириэҕэ диэн Үөһээ Бүлүүтээҕи киин балыыһа поликлиникатын сэбиэдиссэйэ Анна Львова хоруйдаата.
Күн бүгүн 2 кыбартыыралаах уопсай дьиэ хаарбах дьиэттэн көһөрүү бырагырааматыгар эрдэ хабылоануочаракка турар эбит, онно эбии өссө 4 кыбартыыралааҕы киллэрбиттэр. Бу бырагыраамаҕа уларыйыылар киирэн, бигэргэнэрин кэтэһэллэр, 2022 сылга диэри хаарбах туруктааҕын бигэргэммит дьиэлэр барыта бу бырагыраамаҕа хабыллыахтара диэн эрэннэрдилэр.
Оттуур ходуһалары, бааһыналары чөлүгэр түһэриигэ, мелиорация үлэлэригэр анаан көрүллэр көмө харчы улаатыа дуо диэн ыйыттылар.
Нэһилиэккэ уот ситимин баҕаналара олус эргэрбиттэрин, саҥардар өрөмүөн үлэтэ былааҥҥа хаһан баарын, чааһынай ыал тиэргэннэригэр уот баҕаналарын көрөллөрүгэр, дьиэҕэ киирэр уот ситимин СИП-кэ көһөрөллөрүгэр көрдөстүлэр. Быйыл сайын өрөмүөн үлэтэ 0,4-тээх ситимҥэ үлэ барыаҕа. 3 км уһуннаах уот ситимин инвест бырагыраамаҕа киллэрэргэ үлэлэһэллэр. Бу туһунан РЭС салайааччыта Александр Алексеев эппиэттээтэ.
Футболлуур хонуулаах оҕо оонньуур, сынньанар спортивнай былаһааккатын бырайыагын Ороһу нэһилиэгиттэн анал байыаннай дьайыыга сулууспалыы сылдьар уолаттары чиэстиир, үйэтитэр сыаллаах оҥоһуллубут.
Үөрэҕирии эйгэтигэр 54-с сылын үлэлии сылдьар Федора Алексеевна Васильева хас отчуот ахсын Константин Спиридонович Чиряев аатын сүгэр этнопедагогика түмэлин туттарар боппуруоһу боротокуолга киллэрэри туруорсар. Этнопедагогика буоларын иһин култуура министиэристибэтэ чугаһаппатын, араас министиэристибэҕэ сурук суруйбутун, онуоха сөптөөх хоруйу ылбакка сылдьарын этиннэ. Үгэһи иҥэрии, үөрэтии ыытыллыбат буоллаҕына кумахха дьиэ туппут кэриэтэ диэн этэллэрин бэлиэтээтэ уонна дьиэ кэргэн үгэһин ыччакка иҥэрэр сыаллаах үлэлээх тимэ симэлийэ сүппэтэх туһугар бу боппуруоһу өйүүллэригэр, 2027 сылга төрөөбүтэ 100 сыллаах үбүлүөйүн көрсө бырайыагын оҥорууга харчы көрөллөрүгэр көрдөстө.
Оскуола дириэктэрэ Прокопий Никонов оскуола икки симиэнэнэн үлэлии олорорун, маныаха учууталлар уоҥҥа иитээччилэр хамнастарын 1 толору штат ыстаапкатынан ааҕылларын курдук туруорсарын боротокуолга киллэттэрдэ.
"Үөһээ Бүлүү" хаһыат
