دمٌ سالَ من النحرِ.. بسيفٍ سُمَ بالكفرِ
وذبحٌ بالوتين.. حبيبي ياحسين

رغم مذبوح بس عايش.. وذكرك خالد لهل يوم
كلها اتموت الا انته.. يوجه الخالق القيوم
عليك اتسيل دمعتنه.. وعليك ينوح حتى البوم
يغصن الدين واتگطع.. بسيوف الشرك معدوم

دمٌ ما زالَ في الخلدِ.. عبيطٌ حالهُ تُندي
وتبكي كل عين.. حبيبي ياحسين

حرت يحسين اريد اجواب..عليك الخالق المعبود
عندك ما يشح الطيب..يماي وعل خليقة اجود
يوم العاشر بعاشور..مصيبة ما تحدها احدود
ذباحك اشر انسان..وانت اطيب شخص موجود

قتالٌ يخلو من كفئي.. بين البردِ والدفئي
ولا من ناصرين.. حبيبي ياحسين

نار البالگلب يحسين.. ابد متهيد ما تبرد
كل يوم اليمر عاشور.. وعزائك عدنه يتجدد
وايام العزاء اطول.. وندعي الباري تتمدد
باب من الحزن مفتوح.. عسن هل باب ماينسد

سنبقى نُحيي ذكراكا.. وكلي الآن يهواكا
دليلُ الحائرين.. حبيبي يا حسين

يل نحرك روه التاريخ.. من دمّك نزف وانطش
ماشايف شخص عطشان..يروي الدنيا من يعطش
واسمك خالط الدمعات.وعلى الخدين ضل ينقش
مو بس عالترب منثور.. دمك بالعرش منرش

بكتكَ الانسُ والجنُّ.. بصوتٍ واحدٍ انّو
هتافتُ الانين.. حبيبي يا حسين

مواقف ما تحدها حدود .. الها اتشيب الرضعان
منها الطيحة فوگ الگاع..وتلچم جرحك التربان
لطحن صدرك حوافو خيل..داسو عمدا القرآن
كل هذا الحدث يحسين.. عليه اتعاين النسوان

فها قد ترجمَ القولُ.. عويلٌ منهمُ يعلو
على مرِ السنين.. حبيبي يا حسين

بعد ما هشمو صدرك.. بصدرنه اتحشدت آلآم
نار وبينه مستعرة.. ما تطفه بمرور ايام
حرگت كل فرح عدنه.. مثل ما حرگتلها خيام
عرفنه سيدي بذبحك.. ذبحو كل شي اسمه اسلام

فها قد هدّمَ الايمان.. بسيف البغيِ والعدوان
بقومٍ جائرين.. حبيبي يا حسين



https://www.group-telegram.com/wx_xx0.com
الزهرائي صباح العزاوي

رداً على الناصبي عداي الغريري


ياناقص شرف يالعرضه بيه اشكال
عليمن هل حقد وتعادي اهل البيت
تصل بيك الجسارة تفرح بعاشور
وعلى مصاب الحسين توزع الچكليت
يا ناصب يغم ادري النذالة البيك
من ام الجمل والهل سبب شذيت
ابن بنته النبيك هل شهر مذبوح
واشوفك عالجراح بهل ملح طشيت
واضح معدنك يالتدعي الاسلام
منافق بالحقيقة ودين ماخليت

الزهرائي صباح العزاوي

هذا الشهر شهر حسين حضّر دمع لمصابه

لمصابه خل عينك تهل بالدمعة
موكل ملك قارورة بيده يجمعه
يوم الحشر تستلمه امنه البضعة
واطالب الباري هناك تتشفع الاحبابه

اعلن حدادك بالگلب والمظهر
لبيك ياعطشان لازم تجهر
خل صدرك بآه ولطم يتكسّر
واسجد خضوع وتسليم من توصل اعله اعتابه

واسي الزچية بمأتمك كل ليلة
عالريجه يابس والعطش هد حيله
تثبت وجودك بالعزه وتوفيله
عين الله من عرشه الفوگ هلت حزن لخضابه

مخضب دمه واللحيته محنيها
وارض الطفوف بمنحره يرويها
مرمية جثته اعله الشمس تصليها
عالغبرة وتلثت ايام عاري بقى ويصحابه

حمرة السمه وتنگط دمه تبچيله
مجلس عزه بسابع سمه مسويله
واجب صبح لزيارته تمشيله
كل خطوة لبدرب حسين يفتحلك الله ابوابه

كون ابخدمته السيدك تتعبد
واسمه على السانك فخر يتردد
هاي الحرارة بكل محب ماتبرد
تسعر تضل كل عاشور نار المحب لهّابه

الماحضر طيلت حياته بمأتم
كلش صعب يوم القيامة يسلم
كلمن ترك هاي المجالس يندم
وتضل حسرته اتچوّيه ويطول عليه حسابه

تمت يوم الاثنين 30/6/2025
الموافق 4 محرم الحرام 1447هـ
الزهرائي صباح العزاوي

https://www.group-telegram.com/wx_xx0.com

اجـــه الــعبــاس يـرعــد للـنهـر كـاصــد
رجـف مـنه العـذب بچـروفـه ضـل لابـد
مـن شـاف الـكـفل ريـشاتـه تـلـهـب نـار
وسـيفه تـكـول مـنجـل للـركـب حـاصـد
دم عدوانه يگطر من السيف وتارس كاع

صباح العزاوي

https://www.group-telegram.com/wx_xx0.com

يا نافذ البصيرة.. وياكم چنت اميرة
يالطيحتك خلت اثر.. من عدها لحسين انكسر
وآنه اصبحت اسيرة
1_______
يامن نويت اعله النهر.. ياريت ماناوي
لمن رحت گلبي انخمش.. ومن عدها ضل خاوي
يامن ورثت المرجلة.. وگلبك علم حاوي
جرح الاخو من ينچتل.. خوانه شدّاوي

جرح الاخو انت الحييته بروحي
ومن طيحتك كثرن يخويه اجروحي

والچمهن بحنيني.. وآنه ادري ما تجيني
موذر صرت فوك النهر..من عدها لحسين انكسر
وآنه اصبحت اسيرة
2_______
مشهد بطولاتك وصل.. يابو الفضل لينه
وندري الغدر طارئ عرض.. عاذرتك اسكينه
ياخويه منريد العذب.. رد سالم اعلينه
صعبة الخبر لمن وصل.. كالو طفت عينه

حتى النهار اظلم صبح بعيوني
وبچتلتك خويه اشكثر اذوني

زاد الحمل علينه.. وحده بقى ولينه
بفراگك استگوه الدهر.من عدها لحسين انكسر وآنه اصبحت اسيرة
3_______
عالعلگمي اتگطع جثث.. خليت الف وذرة
لاچن ولوك اهل الغدر.. بخطتهم القذرة
من بترو چفوفك يخي.. طاحن شبه بذرة
والمشرعة خاتم صفت.. وچفينك الشذرة

وتبركت گاع الطحت فوكاها
لكن صعب ياخويه تتلكاها

بزنودك الگصيرة.. صورة الم چبيرة
عالمشرعة مگطع وذر.. من عدها لحسين انگسر
وآنه اصبحت اسيرة
4_______
يا آيت الله الگمر.. تضوي البني هاشم
حرز وامان اعله الخيم.. ريتك ترد سالم
يالزاهد بروحك چنت.. وبموتتك عالم
تبت يده الصابك عمد.. هشم گلب فاطم

كل النسه ضجت حزن بصوابك
وحسينك اصوابه الالم بمصابك

صعبة الخبر نطيقة.. موتك صبح حقيقة
بهذا الحدث كلبي نعصرمن عدها لحسين انكسر
وآنه اصبحت اسيرة
5_______
لاخر رمق بعدك سخي.. وقدمته لحسينك
ياخويه كفيت ونعم.. يموفي كل دينك
من كل كتر تنزف چنت.. كله الاجل دينك
ياريته بعيوني السهم.. بس سالمة عينك

عينك ابد مادمّعت تجري بدم
بس عين اخوك الشافتك تشرح هم

ومبيّن بنظرته.. لفگدك شفت حسرته
ما ضل گلب مابي قهر.. من عدها لحسين انكسر
وآنه اصبحت اسير

تمت يوم الجمعة 26/6/2025
الموافق 1 محرم الحرام 1447هـ
الزهرائي صباح العزاوي

https://www.group-telegram.com/wx_xx0.com

لسان حال ام عبد الله الرضيع


نزفك نهر من فاض واتبده دمك
نحرك مسك فواح يبني امنشمك
وليدي شبيدي لمن رحت فكدك طفه عيوني

لـمـن خـذك عـطـشان ظـنيـتك اتـعـود
وبحضني اضمك حيل واشتمك اردود
لاچن رجعت اسكوت جثه انت ممدود
نحرك اجاني يفيض شـط الله مـهدود
وليدي شبيدي لمن رحت فكدك طفه عيوني

لمن رجعلي حسين للخيمة جابك
سابح چنت بدماك هدني مصابك
حاچـيني دمـك ليش غـرگ ثيابك
امنـيتـي بـمناغـات اسمـع جـوابك
وليدي شبيدي لمن رحت فكدك طفه عيوني

فز كلبي فزه اعليك جمرة وچوتني
والـحسرة خنـكت روح بيّه ولوتني
بـمـصـابك اللـوعـات منجل حوتني
والـبـيـه بـس آهـات مـنّـك روتـنـي
وليدي شبيدي لمن رحت فكدك طفه عيوني

صـار الچـفـن لكـماط ومـلـفلـفك زين
حـار السهـم مـن جـاك فـززلك ايدين
نـحرك سهم مصيوب وآلامه بحسين
ارد ابچي آنه اعليك خل يعمن العين
وليدي شبيدي لمن رحت فكدك طفه عيوني

طـول الـسهم ويـاك مـسّاوي طـوله
بس نحرك انت زغير حجم الطفوله
مسموم اجـاك بحيف لحظة وصوله
لـمـن نـبـت شـو داخ ضـل بـذهـولـه
وليدي شبيدي لمن رحت فكدك طفه عيوني

بـفراكـك انـسليـت وصـرت العـليله
نـار اسعـرت بالـروح مابـيـدي حيله
بس ربي يدري شلون كمت اشتكيله
رامـي السهـم مـلعـون مـن الله ويـله
وليدي شبيدي لمن رحت فكدك طفه عيوني


https://www.group-telegram.com/wx_xx0.com
الزهرائي صباح العزاوي

كبر قدرك

يالمـصابك مـاخذ اعماق الخيال
ماوسع عشرك وحك رب الجلال

من كبر قدرك يبو اليمه استحيت
اكـتب وعـن المصاب اقرالي بيت
يـاجـبـيـر ازغـيـر انـه وقـصـريـت
اوصـل اعمـاقك انـه كـلش محال

وبرغم تقصيري بالبال اسرحت
راودتـني صـورة الراس بطشت
جـم حلم مات لرقـية وطـشرت
ياطشت من عنده ماشبعت دلال

وعالرمح قـرآن ناطـق معتلي
مخضب بدمه أبن حيدر علي
ياعجيـبة شلـون مثلك ينولي
ومن بعد جتلك سبو كل العيال

والسبي مو بس على اعيالك جره
الـسـمــه والـكـون كـلـهـا مـجـمـره
عــاصــفــة دم بــتـراب مــعــفــرة
اتـهـدمت لـمـصابك اركـان الـجبال

حيرتي بصفنة خيالي اعله النهر
لنـخلق مـنك عـليك مـن انـحسر
يـااصـل كـل الاصول بـكـل دهـر
يـالذي بـنـورك خـلـق ماي الـزلال

ياأخـيـر اهـل الـكـسـاء الطـاهرين
نـحـرك الـدامـي دلـيـل الـحـائـرين
طيحتك بالطف تحول الشك يقين
تـيقـنـت للـباحـث انـت اكـبر مثال

نهجك الواضح درس لهل العلم
يـعـتـقـد بـيـك الحـليم اليفتهم
انـت يـامـولاي واضـح كـنـجـم
صحبتك مضرب مثل سوح القتال


https://www.group-telegram.com/wx_xx0.com
الزهرائي صباح العزاوي

https://www.tiktok.com/@user21451295461132?_t=ZS-8y07lD4Uz0Z&_r=1


هذا رابط صفحة موكب وهيئة قيّمةُ الدّين
الصفحة جديدة نتمنى دعمكم لها

چان خيال زينب ماتشوفه العين
وفنه الي يشوف اخيال علويّه
لچن شاء الألآه بحكمته ومكتوب
زينب وي حرم للشام مسبيّه
آثار الحبل عالايد معضد صار
بحيث من الزراگ تكول مطليّه
التعثر باليسر بالسوط تنطگ حيل
لچن متشوف عدهن روس محنيّه
فوگ الغيم يمشن موش فوگ الگاع
لان كلهن كواكب نور شمسيّه
تره درب اليسر اطول درب بالكون
لحد الآن نبچي ونقره لطميّه
صار الشام شام الريحة الدخان
لان باقي الاثر فوگ العبي شويه
على صيت البلد چي لنه زينب بي
وبتراب التسحگه تصير قدسيّه


الزهرائي صباح العزاوي

https://www.group-telegram.com/wx_xx0.com

قصيدة الى مولاتي السيدة رقية عليها السلام
بعنوان (رمز الطفولة)




من كربله راحت جسد والكربله رجعت روح
بنتك رقية الرادتك يم راسك وماتت نوح
لمن اجاها.. راسك سباها
يم راسك وماتت نوح
----------------------------------------

لتربت بعزك يبو اليمه سبوها
لمدلله بجالك تره بيك افجعوها
مالحكت تشبع دلال ويتموها

طفلة بعمرها شتريد غير الابو والخوان
لمن صرت عنها بعيد خيمت عليها الاحزان

دور الحزن كوّه انفرض مالايگ اعليها الدور
هاي العزيزة الغالية من فگدتك شبعت جور
جيش الولاها.. راسك سباها
يم راسك وماتت نوح
---------------------------------------

وردة اذبلت من ابعدت عنها بسفرها
درب السبي تراب وضرب ضيع عطرها
هل طفلة عانت يالابو چتلك كسرها

الچانت غصن اخضر دوم يابس صباح وتكسّر
وضل العطش بيها يحوم ولشوفتك تتحسّر

يالشوفتك تروي النظر جان بأملها تشوفك
ماتدري بالراس انبتر واصبع نقص بچفوفك
فگدك طفاها.. راسك سباها
يم راسك وماتت نوح
----------------------------------------

روح وجسد وياك اجت هاي الحنينة
فجأة انهدم بيها الامل صارت حزينة
تفطر گلبها من الالم الله اليعينه

صارت نحيلة وبالآه تتجرع بحسرتها
انت السند الها وجاه مصابك صبح كسرتها

طفلة بعمرها تنسبي وحز الحبل بيديها
وذيچ الصياط اعله المتن طول الدرب تچويها
خصمك ولاها.. وراسك سباها
يم راسك وماتت نوح
---------------------------------------

اول طقوس الفاجعة لموتت رقيّة
رسك اجاها وبالطشت ذيج المسيّة
صدمة وابد ماتنحمل هاي الرزيّة

صرخت يبويه المذبوح وين الجسد لبراسك
منهُ اللعين المفضوح لبسيفه هد وجاسك

تشهك بچي يم لحيتك لمخضبة بدم نحرك
شويّه وهدأ صوت البچي شو لنها ماتت كترك
اجدد عزاها.. راسك سباها
يم راسك وماتت نوح
---------------------------------------

والكربله رد الضعن جدد بلآلآم
بس روح البنية ارجعت والجثة بالشام
چنها اصبحت نسمة هوى ويم راسك اتنام

واعله الطشت مسرح ضيم ودور البطولة البنتك
ضل يبچي مولايه الغيم عاللحية دمك حنتك

منظر الم ماينسي وماتنحمل آحزانه
بهاي الخرابة مختلف حتى الحزن بالوانه
والجدها طه.. راسك سباها
يم راسك وماتت نوح
----------------------------------------

تمت يوم الاثنين 21/7/2025
الموافق 25 محرم الحرام 1447هـ
الزهرائي صباح العزاوي

https://www.group-telegram.com/wx_xx0.com

بكل اربعينية
بهاي الحسينية
يجمعنا حب الزهراء يجمعنا حب الزهراء

نواسي الزهرة بالدمعة ولطم لصدور
على مصاب الحسين الحرگة بينه تفور
ونتنطّر ابو الثارات يميته يثور
تهيّأنه وعلى استعداد ننطي نحور

زهرائي عنواني
مابدله بثاني
تحلالي هاي الاجواء يجمعنا حب الزهراء

تجمعنا لاجل نحيي المجالس هاي
تلمنه هل عقيدة وكلنا نفس الراي
وندعي الله الفرج للمهدي عام الجاي
انتم كل حياتي وجنتي بدنياي

كل همنا نرضيها
لمن نواليها
ونبغض جميع الاعداء يجمعنا حب الزهراء

بعقيدتنا امام اعله الائمة تصير
لفاطم من الآه الكون هل تقدير
منها ومن ولدها ناخذ التفسير
وجب ننشر حقائق هذه للتصدير

هذه مهمتنا
ونرفعها رايتنا
وترفرف بكل بيداء يجمعنا حب الزهراء

بمنهجنا ابد من جامل مقصر
عقيدتنا برائية ولعن تمطر
خصوصا لليگول اعله النبي يهجر
سبب چتل الحسين وگطعت الخنصر

وبكل فرض نلعن
وعيونه يدمعن
عالعاري ضل بالصحراء يجمعنا حب الزهراء

بهذا الملتقى نحيي مصاب حسين
ونسولف عن ابو فاضل نطه الچفين
وعن زينب سبية وهم لفاها البين
اذن واجب علينا نهل دمع بالعين

نريد الرضى منهم
وناخذ فقط عنهم
نجنب احنه الاخطاء يجمعنا حب الزهراء

تمت يوم الاحد 10/8/2025
الموافق 15صفر 1447هـ
الزهرائي صباح العزاوي
https://www.group-telegram.com/wx_xx0.com

يابويه مذبوح عطشان الحسين
بالچن ترويه عطشان الحسين

لمروي دين الله بدمه چبده تفطر
فوك العطش صدره انسحك حيل وتوذر
وآنه انظر الحالة وبالم گلبي تعور
بعيوني ياريته العمى ولا هيچ منظر

خل تعمه هل عين عطشان الحسين

ماي الشريعة اعلينه شح وراح اليفجها
ماشفنا ماي بكربله بس ماي وجها
وطاح اعله وجها امخضب وگاع الله رجها
كل ذرة اتراب احرمت يم جسمه حجها

چي ذروة الدين عطشان الحسين

يابويه كلشي بكربله ماينحمل صار
واولهن الگاع وسمه يمنه اصبحن نار
بالعاشر الطف انگلب ياحامي الجار
وحسينك اتحيطه العده وضل وحده محتار

ينطي الوجه وين عطشان الحسين

ماشفنا ناصر من وگع ينصر ولينه
ضلت على اخيامي تصد مشبوحة عينه
موقف ابد ماينحمل الله اليعينه
وبس غمضت عينه وطفت احنه انولينه

جنب الصواوين عطشان الحسين

ماضل مكان بلا جرح كل جسمه ينزف
وجروحه من كثر الكرم ماتقبل اجف
عالغبرة طايح وبرعب عدوانه ترجف
ضجت ملائكة السمه ويحسين تهتف

مابي كتر زين عطشان الحسين

ضلوع الحسين بكربله داستهن الخيل
من شفته ياحيدر علي ماضلي كل حيل
واظلمت الدنيا الظهر وتحولت ليل
كون الخيول السحگته يشملهن الويل

بجسمه النياشين عشان الحسين

بحال الاخوها ينچتل بس الله يعلم
بفراگه لو ميته بقهر لو عايشة بهم
من شفته عاري بلا چفن وموسد بدم
ريحت مسك بالطف بقت من كترة نشتم

كل هل عناوين عطشان الحسين

تمت يوم الجمعة 8/8/2025
الموافق 13 صفر 1447هـ
الزهرائي صباح العزاوي

https://www.group-telegram.com/wx_xx0.com