group-telegram.com/uzbek_weightlifting/10360
Last Update:
Federatsiya rahbariyati va viloyat murabbiylari ishtirokida yig‘ilish o‘tkazildi
Bugun Chirchiq shahri mezbonlik qilgan kattalar va yoshlar o‘rtasida O‘zbekiston chempionati hamda "Uzbekistan open" ochiq chempionati musobaqalari o‘z yakuniga yetdi. Turnirning so'nggi kunida hududlardan kelgan murabbiylar ishtirokida yig‘ilish o‘tkazildi.
Unda Sport vaziri o‘rinbosari, O‘zbekiston Og‘ir atletika federatsiyasi raisining birinchi o‘rinbosari Shaxrillo Maxmudov, terma jamoa bosh murabbiyi Baxrom Mendiboyev hamda terma jamoa eksperti Xolid Korani ishtirok etdi. Yig‘ilish avvalida Shaxrillo Maxmudov bir hafta davom etgan musobaqalar har jihatdan yuqori saviyada tashkil etilganini va belgilangan sport prinsiplari asosida adolatli o‘tkazilganini alohida e’tirof etgan holda tashkilotchilarga, shu jumladan murabbiylarga o‘z minnatdorchiligini bildirdi.
Bundan tashqari, musobaqalarda qayd etilgan yuqori natijalar alohida tilga olindi va shu bilan birga sportchilar tomonidan yo‘l qo‘yilgan texnik xatolar ustida ishlab, ularni bartaraf etish bo‘yicha ko‘rsatmalar berib o‘tildi.
Shaxrillo Maxmudov o‘z nutqi davomida shuningdek, sportchilarning antidoping qoidalariga qat’iy amal qilishlari lozimligi va bu borada murabbiylarning mas’uliyati har qachongidan ham yuqori ekanligini yana bir bor ta’kidlab, federatsiya va Milliy antidoping agentligi o‘rtasida o‘zaro yaqindan hamkorlik yo‘lga qo‘yilgani bois mahalliy musobaqalarda ham sportchilardan doping sinamalari muntazam olib borilishi va ushbu yo‘nalishdagi ishlar qat’iy nazorat qilinishini ma’lum qildi.
Yig‘ilish kun tartibidan o‘rin olgan yana bir muhim masala - xorijlik mutaxassis tajribasini hududlarda ham keng qo‘llash bo‘yicha bo‘ldi. Unga ko‘ra, har oyda ikki marta onlayn tarzda xorijlik mutaxassis Xolid Korani ishtirokida hududlardagi murabbiylar uchun maxsus darslar tashkil etilishi belgilab berildi. Bundan ko‘zlangan asosiy maqsad - hududlarda shug‘ullanayotgan sportchilarning texnikasi ustida ishlab, ularni terma jamoaga jalb etilguniga qadar to‘g‘ri yo‘naltirishdan iborat.
👉
