group-telegram.com/bashkhanzaman/31
Last Update:
АҘАҒЫНДА ИЛАРЛЫҠ БУЛМАҺЫН
Рәсәй Империяһы флагына бәйле ваҡиғаларҙы һаман ҡуйыртырға маташалар. Беләһегеҙҙер, яңыраҡ Бөрйән районынан йәш егеттәр (әле балиғ йәшкә лә етмәгән) Башҡортостан һәм Рәсәй Империяһы флагтарын һатып алып, шулар менән фотоға төшөп, интернет селтәренә һалғайны.
Шунда уҡ экстремистар һәм уларҙың сит илдәрҙәге әшнәләре йәмғиәттә йәштәргә ҡарата кире фекер уятыу маҡсатында яман һүҙҙәр, кире мәғлүмәт таратырға тотондо. Уларҙың ҡотҡоһона бирелгән өлкәнерәк йәштәге бер нисә кеше Бөрйән егеттәрен ғәфү үтенеп видеоға төшөргә мәжбүр итте хатта. Әммә йәштәрҙе МХО ветерандары һәм патриотик йәмәғәтселек яҡлап сыҡты, ә хоҡуҡ һаҡлау органдары экстремистар яҡлы ике кешегә ҡарата енәйәт эше асты.
Бына хәҙер билдәһеҙ кешеләр Рәсәй Империяһы флагын Бөрйән районы сигендәге стела эргәһендә ергә һалып яндырыуҙарын видеоға төшөрөп һалған. Яҙма башта Украина махсус хеҙмәттәренә буйһондороулы телеграм-каналдар буйлап таратыла, аҙаҡ уларҙы Рәсәйҙәге рәсми булмаған төрлө сығанаҡтар күтәрмәләп алды. Был ҡылыҡҡа шундай ғына баһа бирергә була: балиғ булмаған йәштәребеҙҙе власть һәм йәмәғәтселектең берҙәм яҡлауына яуап итеп тағы ла ҡотҡо таратырға маташалар.
Бындай осраҡтарҙа һәр кем үҙенең алдындағы яуаплыҡ тураһында уйланһа ине. Тәү сиратта, әлбиттә, шундай экстремистик видеоны кемуҙарҙан таратҡан сығанаҡтарҙың мөхәррирҙәренә ҡағыла был: ошо ҡылыҡтары менән улар экстремистарҙың һәм Украина махсус хеҙмәттәренең милләт-ара дошманлыҡ тыуҙырыу маҡсатына булышлыҡ итә лә баһа! Бындай темаларға ҡағылышлы яңылыҡтарға һәр ваҡыт йәшертен исем аҫтында ултырған Украина боттары комментарийҙар яҙып, юрамал төрлө ыҙғыш-талаш ҡуптарырға тырышыуын аңларға кәрәк.
Ә инде Рәсәй Империяһы флагын яндырыу кеүек асыҡ провокацияларҙа ҡатнашыусыларға килгәндә, енәйәт өҫтөндә тотолмағанға күрә бының өсөн яуаплылыҡҡа тарттырылмаһағыҙ ҙа, Украина махсус хеҙмәттәре ҡармағына эләгеүегеҙ тураһында уйланырға кәрәк. Ата-бабаларыбыҙ юҡҡа ғына: “Яман менән көлһәң, аҙағында иларһың”, - тимәгән бит. Икенсе юлы уларҙың “үтенесе” быға ҡарағанда ла хәүефлерәк булыуы, тағы ла ҙурыраҡ енәйәткә этәреүе бар. Теләһәң дә артҡа сигенеп булмаҫ ул саҡта: исемегеҙҙе бар халыҡҡа фаш итеү менән ҡурҡытһалар?
Ҡырын эш ҡырҡ йылдан һуң да беленә бит ул, йәмәғәт. Был осраҡ уйландырһын ине барыһын да.
BY Ханзаман 🖋
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/bashkhanzaman/31