group-telegram.com/tatar_yadkarlare/8169
Last Update:
Мифларыбызны барлауны үзенчәлекле персонажларыбызның берсе - су анасы белән дәвам итәбез.
Су анасы төрки татар дөньясына хас булганча, су ияләренең берсе буларак аңланылучы мифик зат.
Ул статусы буенча елга- күлләрнең хуҗасы/ бабасы кебек мифик затлардан бер баскычка түбәнрәк тора.
Су анасы кыяфәте буенча, калкып алга чыккан зур кара күзле, җиргә кадәр төшеп торучы кара озын чәчле урта яшьләрдәге хатын - кыз җенесеннән булган зат кебек күзаллана.
Ул җәйге айлы төннәрдә елга - күл буйларында үсүче камышлар арасында яисә басмада утырып, алтын тарагы белән чәчләрен тарарга ярата. Кешеләр белән аралашуны бик өнәми. Ул чәчен тарап утырганда берәр кеше аны өркетсә, тарагын онытып калдырып, суга чумарга мөмкин. Алтын тарагын берәрсе алса, ул әлеге кешенең өенә килеп, аны тарагын кайтарганчы, гел борчып, куркытып торачак.
Су анасының тагын бер холкы бар. Ул аңа дип атап, тиешле корбан бирмәсәләр, аның күңелен күрмәсәләр үзенә корбан итеп берәр сабыйны суга батыра. Шуңа күрә зур сулыклар буенда яшәүче татарларда су коеныр, көймәләрдә балыкка төшәр вакытлар җитәр алдыннан Су анасына 7 төрле әйбердән торган (җеп, сөяктән ясалган тарак, тимер йозак, йомырка, агач күмере, ярма, төймә кебек) корбан төенчеге бирү ритуалын башкаралар.
Татарлар Су анасына корбан бирер вакытлар җиткәндәрәк судан улаган, гүләгән тавышлар чыга башлый дип тә ышаналар. Гадәттә, мондый тавышлар ишетелүе май ае урталарына туры килә диләр.
#татар_мифлары
BY Татар ядкарьләре
Share with your friend now:
group-telegram.com/tatar_yadkarlare/8169