group-telegram.com/eltuz2022/35155
Last Update:
ХАТИРЧИ ҲОКИМИ НОМЗОДНИ "СУДЛАНГАН" ДЕГАН БАҲОНА БИЛАН САЙЛОВДАН ЧЕТЛАТДИ
Навоий вилояти Хатирчи туманидаги Тамабахрин маҳалласи фаоли бўлиб ишлаган Саибназаров Рауф Тошхонович Элтуз таҳририятига мурожаат қилиб, туман ҳокимияти томонидан унинг раисликка номзоди асоссиз равишда рад этилганини маълум қилди.
Рауф Саибназаров ўз мурожаатида ёзишича, у 2022 йилда халқ томонидан сайланган ва 2025 йил 27 майга қадар Тамабахрин маҳалла фуқаролар йиғини раиси сифатида фаолият юритган. Ваколат муддати тугагач, у яна ушбу лавозим учун номзод сифатида таклиф қилинган, бироқ туман ҳокими Умиджон Адизов томонидан “судланган фуқаро” деган баҳона билан суҳбатга ҳам киритилмаган.
Мен икки олий ўқув юртини битирган, магистр даражасига эга мутахассисман. Иш фаолиятим давомида ҳеч кимнинг манфаатидан фойдаланмаганман. Халққа қўлимдан келганича ёрдам қилдим. Аммо ҳоким мени номзод сифатида қўллаб-қувватламади. Асос сифатида ‘судланган’ деб кўрсатди, лекин бу нотўғри. Қўлимда судланмаганлигим ҳақида расмий ҳужжат бор, — дейилади мурожаатда.
Унинг сўзларига кўра, туман ҳокими берган бундай баҳо мутлақо асоссиз ва халқ иродасига қарши ҳисобланади.
Савол туғилади: агар маҳалла раисини халқ сайласа, у ҳолда ҳокимнинг бир томонлама қарор чиқаришга ва “нолойиқ” деб баҳолашга ҳуқуқи борми?
Мурожаатда Саибназаров Раўф Тошхонович ўзининг фуқаролик ҳуқуқлари ҳимоя қилиниши, номзод сифатида кўриб чиқилиш имконияти қайта тикланишини сўрамоқда. У бу масалада оммавий ахборот воситалари ва тегишли ташкилотлардан ёрдам сўрамоқда.
Элтуз таҳририяти ушбу ҳолат юзасидан Хатирчи туман ҳокимиятидан расмий изоҳ сўрайди.
