«Закрыццё мяжы закранула тую моладзь, якая цяпер засталася ў Беларусі і не мае магчымасці з'ехаць з краіны і патрапіць у Літву. Ім даводзіцца шукаць нейкія абходныя шляхі, як патрапіць у Еўрасаюз, таму што ёсць цяпер студэнты, якія паступілі ва ўніверсітэты, навучаліся там на працягу некалькіх месяцаў і цяпер паехалі да бацькоў. Гэта вельмі распаўсюджаная гісторыя. Для мяне гэта вельмі крытычнае пытанне, бо мы разумеем, што для студэнтаў адсутнасць магчымасці прысутнічаць фізічна ва ўніверсітэце можа прывесці да адлічэння. І людзі трапілі ў такую сітуацыю менавіта з-за таго, што Лукашэнка ладзіць правакацыі, якія пагражаюць бяспецы Літвы».

«У апошнія гады Кітай інвеставаў шмат у тое, каб пашырыць сваю прысутнасць на тэрыторыі Беларусі праз адкрыццё культурніцкіх цэнтраў ва ўніверсітэтах і адкрыццё праграмаў па абмене з Беларуссю. І цяпер, насамрэч, ён набірае папулярнасць. Але я б не рэкамендавала навучацца ў Кітаі. Канешне, гэта можа быць цікавым досведам таксама, як альтэрнатыва Расіі. Але там ёсць свае акалічнасці, бо Кітай — недэмакратычная краіна. Гэта краіна, якая выкарыстоўвае тыя ж падыходы да кантролю за насельніцтвам, якія выкарыстоўвае і Беларусь. Нават камеры назірання, якія ўсталёўваюцца на тэрыторыі Кітая, імпартуюцца ў Беларусь, як механізм для кантролю насельніцтва праз штучны інтэлект і адсочванне твараў».

«Для мяне вялікі гонар атрымаць прэмію Магніцкага і падзяліць яе з маім любым мужам Сяргеем.

Сёння ўвечары мы хацелі б прысвяціць яе ўсім тым, хто, як і сам Сяргей Магніцкі, пакутуе за кратамі, але адмовіўся пакланіцца несправядлівасці.

Мы прысвячаем яе Алесю Бяляцкаму, нашаму лаўрэату Нобелеўскай прэміі міру, які нават у турме ўсё яшчэ марыць пра свабодную, еўрапейскую Беларусь.

Кацярыне Андрэевай, журналістцы, якая працягвала весці прамую трансляцыю, нават калі яе арыштоўвалі ў эфіры. 

Машы Калеснікавай, якая парвала свой пашпарт, адмовіўшыся пакінуць краіну пад прымусам.

Анджэю Пачобуту, польска-беларускаму журналісту, які адмовіўся станавіцца на калені і прасіць «прабачэння» ў дыктатара.

Міколе Статкевічу, афіцэру і палітыку, які адмовіўся ад незаконнай дэпартацыі і быў зноў выкрадзены прыспешнікамі Лукашэнкі.

Мы прысвячаем гэтую ўзнагароду ўсім 1300 палітвязням. Іх узялі ў закладнікі за любоў да сваёй краіны і да свабоды».

«Форум Астрожскіх — гэта галоўная пляцоўка па беларуска-ўкраінскіх стасунках. Былі зладжаныя сем панэльных дыскусіяў, і, што самае важнае, пасля кожнай з іх будуць практычныя крокі — няма ніякіх сумневаў. Вялікі дзякуй удзельнікам і арганізатарам форуму».

«Я ганаруся беларускімі студэнтамі.

Вы выраслі ў няпэўнасці і ператварылі яе ў незалежнасць. Вы вучыцеся, пераязджаеце, адкрываеце бізнесы, вывучаеце новыя мовы, змяняеце прафесіі, краіны — і ўсё адно застаяцеся сабой.

Быць беларускім студэнтам — гэта няпроста, але вы неверагодна моцныя. Вы навучаецеся ў лепшых універсітэтах свету. Вы працуеце ў Google, Meta, у многіх міжнародных кампаніях. Вы адкрываеце стартапы, вы канкурыруеце ў мастацтве, становіцеся лепшымі лекарамі, спартсменамі. Вы абіраеце нестандартныя шляхі — BIM-тэхналогіі, лічбавыя навыкі — і канкурыруеце з выпускнікамі лепшых міжнародных універсітэтаў і вопытнымі спецыялістамі. Як маладыя прадпрымальнікі, што памыляліся, вучыліся, прыстасоўваліся і развівалі свае справы праз ментарства і настойлівасць. Як тыя, хто перасек межы, каб вучыцца на юрыстаў, інжынераў, міжнароднікаў — нягледзячы на пагрозы і адлічэнні, абраўшы адукацыю замест маўчання.

Вы не чакаеце дазволу — вы ствараеце сваю будучыню. Кожны курс, кожная праца, кожны невялікі праект, які вы пачынаеце, ужо змяняе Беларусь. Вы даказваеце, што беларуская моладзь — гэта выдатныя прафесіяналы, а не тыя, хто чакае.
Усе вы абралі рост замест зручнасці. Усе вы абіраеце тое жыццё, і тую будучыню, якой сапраўды заслугоўваеце. 

Сённяшні дзень — гэта дзень смеласці, творчасці і свабоды думкі. Гэта пра сотні з вас, што ствараюць стартапы, пра тысячы, што падаюцца на стыпендыі за мяжой, пра тых, хто адмаўляецца ад абмежаванняў, якія вам навязалі.

З Днём студэнта ўсіх, хто працягвае расці, нягледзячы ні на што».