-
" اللهم ألَّا يُصاب قلبي بوهن، أو يكسِر كرامتي طلبًا، أو أُشفِق على نفسي بعد ركضٍ طويل في طريقٍ خاطيء؛ اللهُم الصواب في كُل قرار، ونور البصيرة لكُل حاجة، والهُدى الذى لا يمسَّه ظُلمة ولا يعقبه أيّ ندم❤️ ."

اللهم صل وسلم على نبينا محمد وعلى اله وصحبه اجمعين

#هذا_الصباح❤️


- في مرة قرأت نقاش لواحدة على الانستا بتتساءل عن ..

انه ليه دايمًا لازم نحس بمشاعر ما حقتنا، ونعتمد أجوبة ما حقتنا، بس عشان المجتمع كله بقول دا وعشان
دا السائد المعروف!

اي زول تسأله من الشغل، القراية، اي شي في تفاصيل الحياة، بكون رده سلبي
وفيه نوع من عدم الرضا!
وانه تعبان وزهجان من الحالة دي!
في حين قالت انه هي عن نفسها لمن شخص يسالها بتقول الحمد لله وانها مبسوطة برغم التعب!
ولاحظت انه ردود الناس بعد كلامها طوالي بتتغير!
بدل ما كانت بتشكي من الشغل والتعب بقت ردودهم إيجابية!
وحتى لو إنت ما بتحب تحكي تفاصيل حياتك
لكن على الأقل "الحمد لله" اللي بتطلع منك تكون راضية،
لانه مع الوقت، لمن تاخذي شعور ما حقك، ببقى
بعد شوية جزء منك، وبدل ما كنت مستمتعة بالرحلة وشاكرة ربنا على نعمة الشغل والقراية وغيره برغم التعب، هـتبقى ساخطة وزهجانة وما راضية بالنعمة وقد تسلب منك في لحظة!

- وأنا بقرأ الكلام حسيت انه ما وقع لي
وانه فيه شي من المثالية..
لحد أمس سألتني بنوتة في الخاص نفس
السؤال عن نفس الموضوع!
ليه الجيل دا بقى بيأخذ الحزن أكبر من
حجمه؟
اي موقف داير يقيف فيه، وأي كلمة داير يقيف ويحزن عليها، بالرغم انه حقيقي
في مواقف ما بتستاهل.
وأنا هنا ما بتكلم أبدًا عن الحزن الحقيقي تجاه أمر جلل ولا التعب الحقيقي..
إنما عن الاستهلاك المفرط لشعور الحزن
والكل عاوز يزعل ويكتئب وينعزل..
بقى عندنا جيل بستهلك كلمات الحزن والمشاعر السلبية بافراط، واي شي ما راضي عنه، وما عاوزين اي ذرة تعب، وأي حاجة في الدنيا متعبة بتلقى الواحد طوالي متذمر وزهجان!
في حين اساس الدنيا هو الكدر والتعب ولو ما كانت كده ما كانت بقت دنيا، وحدها الخالية منه هي الجنة!

- أقرب مثال لينا هم ناس عزة..
هم بشر وبزعلوا وبتألموا زي زيك..
يوم شفنا واحد فيهم قال داير ينعزل ولا أصابه حزن شديد يوصله للاكتئاب؟
وأقرب من دا هي دكتورة آلاء النجار، الطبيبة، الأم اللي فقدت أولادها كلهم دفعة واحدة!
ما اعتقد في حزن أكبر من دا، ولا شعور مؤلم أكتر من دا، وأنا متأكدة انها حزينة شديد، لكنها مؤمنة، والمؤمن القوي لا تعطله الأحزان عن العمل، والمؤمن يعلم أن كل شي أعطاه الله له هو لله، ياخذه متى شاء ويعطي متى شاء..
هل تنازع الله في ملكه؟ فإنه له وإنا إليه راجعون.

- خلاصة القول..
إن الميديا والبيئة المحيطة والأفكار الغربية وما يفرضونه على هذا الجيل كله حتى لا تقوى شوكته، لأنك كلما حزنت واشتغلت بالدنيا أكتر، كلما كنت مستهلك أكتر، وكلما بعدت عن الغايات العظمى والأهداف العالية، وكلما بعدت عن الدين، وجدوا ثغرًا يدخلون منه إليك.
نتعلم انه ما أي موقف نقيف فيه، ونتعلم من تجاربنا الفاتت وما مر علينا من أشخاص ومواقف، ما أي شي يستاهل حزنك واستهلاكك لمشاعرك، لمن تتجاوز ما عشان الطرف الثاني، عشان نفسك، وإنو لو وقفت في كل صغيرة وكبيرة عمرك كله هـيضيع وإنت ما أنجزت شي، دي مهمة صعبة عارفة، بس المحاولة شرف لازم.
أعطي كل حاجة شعورها الحقيقي اللي إنت بتحس فيه، واعلم أن كل ما أنت فيه نعمة من الله لن تحصي ثناءها وشكرها ما حييت، والتعب اساس الدنيا، ماف مهرب منه، بدل التذمر منه، أنظر للجانب الممتلئ من الكأس، نعمة العمل والقراية وعدم الفراغ والسعي في الأرض، وإنك لو
نويت انها كله لله جاءتك منها الأجور والحسنات.

- أخيرًا..
لا مثالية في تجاوزك المواقف، في تقييمك الصحيح لمشاعرك، ما يحتاج أكثر وما يحتاج أقل، في وعيك وإدراكك، في تقديرك للنعم، في الرضا عن حالك واحوالك، في السعي والتعب، إن كانت كلها لله، فقد حزت الدنيا والآخرة،
وأن كل شيء في هذه الدنيا لله، يأخذه متى شاء ويعطي متى شاء، فهل تنازع الله في ملكه؟❤️.


#زكية_عاطف

تقرأ اقتباسًا ما، فيقبض قلبك، أنت لا تصدق أن أحدهم كان يشعر بذات ما تشعر به، أن أحدهم استطاع أن يكتب قلبك العميق في سطرين، وأن ثمة أحد ما يشاركك دهشاتك الصغيرة وتفاصيلك الخفية🤎.

هذه القناة أرشيف خاص لبعض الخواطر، جزء من كتاباتي، وإقتباسات مُنسقة مع ما أجمعه من لقطات مما أشاهده💻 ✨

قروب بودكاست الصباح البدري
الآن على واتساب

هذا البودكاست 🎤

بطابع كتابي وأحياناً سمعي حتى أجد صوتي الضائع

الغرض من هذا البودكاست هو مشاركه التجارب الملهمه والمختلفة حمن أجل أن تعم الفائده ..

انضم بالضغط على هذا الرابط ⤵️

https://chat.whatsapp.com/DmPChDiYGpS5pKIhvbj4Wh

صباح الخير 🌷

للتذكير

لا الشغل سهل ، ولا عدم الشغل راحة.
لا الزواج سهل ، ولا العزوبية حلوة.
لا السفر برة سهل ، ولا النجاح في بلدك متيسر.
لا النجاح في الدراسة سهل ، ولا الفشل فيها كويس .
لا المحافظة على العلاقات سهلة ، ولا قطع العلاقات حاجة محمودة.

لا تطوير الذات سهل ، ولا تفضل محلك حلو.

كله فيه تعب ، وكله فيه معاناة ...

بس انت بختار وين عايز توجه تعبك ؟

و دايماً خلي "الحمد لله" على لسانك مهما كان وضعك.

وبس كدة .✨

@fadfadah98

فرصة ذهبية لاااا تفوت😍✨

تم البدء حالياً في رفع بعض المحاضرات التنويرية المجانية من كورس #يلا_نزبط_الأوبس.

على القناة الخاصة 👇🏻

" بصمة طبيبة" 🩷

على الرابط:

https://www.group-telegram.com/tanzeelmedicine/11


سااارع بالإشتراك واستمتع بالتجربة 😌

وانتظر بقية الفعاليات القادمة💌🎉

مساء الخير🌷
#تحبو_نتونس؟!


للبنات ..♥️

- ما تقيفي في نقطة وحدة وتركزي عليها في كل حاجة..

- وما تدقي الباب الما إتفتح ليك مرتين.

- والدعوات ما تخليها تجاه حاجة معينة

- ما تقرري تشتغلي حاجة معينة وتقيفي عليها ختي معاها خيار تاني وخيارين وتلاتة وفي الأخر حتشيليهم كلهم مع بعض!

- ما تحددي حاجة وتعتبري انو خلاص بعافر قصادها بس حددي حاجتك وإستخدمي حاجات غيرها توصلك ليها.

عندي صحبتي كانت منى عينها تشتغل في الكويت فجأة سافرت السعودية وإشتغلت سألتها طيب والكويت ؟
"قالت لي بلم في قروش من شغلي عشان أقدر أمشي الكويت أشترت عقد عمل وأسي شغالة في الكويت الحمدلله."

فـ نصيحتي ليك ما تقيفي تجاه حاجة معينة منتظراها تجي هي وبس جاهدي عليها بكل خيار يتوفر قدامك وإستعملي حاجات كتيرة عشان ما تنجزي حاجة وحدة تكوني شملتي معاك كم حاجة في نفس الوقت.

ولما قلبك يكون عاوز يعمل حاجة أعمليها عشان لو مشيتي تمشي من غير ندم أعملي كل حاجة وكل خطوة عشان نفسك!

وأول ما تكوني حقيقية بتقدمي كل حاجة بطبيعتك حتلقي القاعدة دي ساعدتك في كل حاجة حولك وبتقابلي الحقيقة في كل مكان.

إشتغلي ما عشان زي ما بقولوا لو طلع راجلك كعب تضمني مستقبلك
بتشتغلي عشان نفسك تطوريها ، تنظميها ، تنفعيهاوتختاري ليها راجل ينفعها.

وعشان اصلاً رؤية النساء الناجحات منظر يسر الخاطر
أبقي منهن!♥️

وما تحجمي جزء من حياتك على حاجة محددة خلي كل حاجة مفتوحة نسبة لأقدار ربنا اللي ممكن ما تتوافق مع تحجيمكش

ونحن موجودين عشان هدف كل ما هدفك يفشل تختاري هدف تاني ما عايشة انتي ساي من غير هدف
إختاري هدفك وأصنعي ليهو طرق كتيرة وأي فرصة تتاح قدامك فيها إحتمال واحد في المية توصلك لهدفك إستخدميها.

وأنشلي نفسك كدا وختيها في محيط البزنس الونسة والضحك ملحوقة.

وقربي من ربنا عشان هو وكيلك ونصيرك
ونقي الناس الحولك البِرضو ربنا ما تنقي إنسان ربنا ما راضي عنو عشان حيغطس حجرك!

وأهم حاجة ما تقيفي في مكانك ابداً ابداً إتحركي وإتحركي عشرة خطوات ما خطوة.

وقدر ما تنجحي أسعي إنك تنجحي أكتر وأكتر عشان النجاح سلسلة ما عندها أخر ما تقيفي في مكان واحد أطمعي إنك دايماً تمشي لي قدام.

وخلي عندك قاعدة إنو بعد التعب برتاح وأصلاً حترتاحي شوفي كل حاجة توصلك للراحة وأمشي فيها العمر بنعاش مرة وحدة نقعد نقضيها فشلت وبكا شهرين ولا انسان طلع كعب وبكا تاني شهرين لشنوو؟

واتجاوزي كتير
او عودي روحك على التجاوز
اتجاوزي الكلام ، النقاشات الهايفة ، سفاسف المواضيع ، صُحبة بتجيب مشاكل ، علاقات ما منها نكهة

واعرفي انو اي موضوع بخص شخص تاني أخد منك فترة اكتر من ساعة
ف الموضوع دا فيهو خسارة ليك
الدنيا ما فيها زمن كتير عشان تضيعي ساعات على مهاترات ودراما

ف دا ما يشتغل وينجز دا يحب نفسو أول حاجة لأنو الطريق دا عاوز قوة وحب ذات كبير تبكي وانتي بتشتغلي يعني شنو وتنسي البكا بعد شوية وتكوني انجزتي.

اتواصلي مع نفسك كل فترة اتأكدي من إنها ماشة صح او محتاجة تصحيح مسار
وأنفعيها الى ان تبقي انسان ما فاضي لي فتافيت المواضيع
وفي الفرغة ما يلقوك وفي الشينة ما يذكروك

وادوار الضحية ليها ناسها ما تبقي منهم.

ومنظر الناس اللي بيقولوا ضربوني ، نبزوني ، شاكلوني
منظر ما حلو ابداً
واصلاً اصلاً الموضوع دا ممكن يلمس نقطة الستر ونحن كلنا يا الله مستورين!

والايام دي مركز في مخي سؤال فادني شديد ونفعني جداً
" شبابك فيما أفنيتهُ "
اسألوا نفسكم كل يوم نفس السؤال كأنوا أخر يوم ليكم
حتتبسطوا بالاجابة!

وعلى الأقل نحن لسة عندنا خيار إننا نعدل الإجابة

وشكراً♥️ .


#إسراء_الخليفة.
@fadfadah98

سبحان الله !

حال الإنسان موضع تأمل دايماً

شوفو أبسط مثال

لم بتتحدّف علينا المصايب .. بنهلع ، بنحزن ، بنخاف ونشيل هم كيف حنعدي منها ؟

وممكن حتى ما نشوف انها حتعدي

مع انه ما أول كارثة!
ولا حتكون الأخيرة

بس كل مرة بنعيشها كأول مرة

كانه بيحصل لينا refresh مش updated.

بالتدريج نبدأ نفقد المنطق
ونبطل نتصبّر
ويقلّ بصيص الأمل

بل ممكن نفقده خالص !
قصاد حجم المصيبة او المأساة الكارثية وغير المُتوقعة .

فـ نتخبط في الظلام

نتوه

ونغرق في دوامة اليأس الشيطانية -لانها من فعل الشيطان أصلاً-

ورغم ده

يجينا المَدد والعون من فوق ..

فنصبر ، ونعدي ..

زي كل مرة

شحذ إلهي عجيب لقدرات الصبر عندنا

خُطط إلهية مُحكمة لا تشوبها شائبة

بتخطيط مسبق وحكمة لا مثيل لها

مصيبة ورا مصيبة
ضيق ورا ضيق

ويكاد أحياناً ما تكون في أي فترات إستراحة ، او قابات للتنفيس

من ضيق لضيق لمّ الواحد يحسّ انه حيفضل كدة طول عمره

" طوول عمره؟! "

ههه .. نظرتنا ضيقة شديد صح ؟!

والله دايما كدة .

من أقل موية بنسيح .

ما بنعرف نعاين للصورة كاملة

بنفتكر انه كِبرنا ،نضجنا و وعِينا ..

بس لا ، لسا ضعيفين.

ودايما موجهين نظرتنا لحتة محدودة

عشان كدة كان الربّ الحليم -ربنا- دايماً حاضر

بيمدّنا بعونه ومدّده ، وبيخلق العسر على مقاسنا تماماً .

بيزيد شدته صح كل ليفل
لازم يحصل upgrading

بس بيتناسب دايماً مع حجم قدرتنا على الإحتمال.
definitely!

بلا شك .

لانه ربنا المؤمنين بيهو ؟
حليييم وحكيم لا يمكن يوجهّنا لهلاكنا .

كله دايما لخير ، لمصلحتنا .

احنا دوناً عن كل الخلائق.. مُخيرين

بإرادتنا الحرة نختار نؤمن ونصدق بأنه دايماً في أمل ، مهما إتعسرت.

وبإرادتنا بنفقد الأمل ، ونجزع ..

او بنفتكر اننا فقدناه ، لكن يظل بلا شك في أشدّ أوقات يأسنا خيط ضئيل ،رفيع ،غير مرئي من الأمل .. بربنا

والخيط ده كان سبب نجاتنا في كل مرة .

"انه لا ييأس من رَوح الله الا القوم الكافرون."


ونعم بالله♡.


فـ هذا تذكيرٌ لنفسي الضعيفة

انه مهما بلغ العسر مبلغه ؟!
لابدّ لليسر يوم .

وما دام في قوة إلهية عادلة-جداً- بتتحكم بالكون ؟

فكله حيسوقني دايماً للخير ..حتى لو وعيته متأخر.

المهم أنو كل وجع بيعدي علي بيديني درس

وكل درس بتعلمه بالتجربة عمري ما ح انساه

وكل حاجة عمري م ح انساها قاعدة تبني|تشيّد جواي كينونة مهما بدت ملامحها غير واضحة ، غير مفهومة، متخلبطة و هشّة حالياً ؟

إلا أنو في نهاية المطاف
دي كينونتي أنا
تفرّدي الخاص وبصمتي الخالصة في الكون ده

و حيجي يوم اكون قادرة فيه اشوف الصورة كاملة لأول مرة

وأبقى فخورة بالنتيجة النهائية مهما كانت .

_على ثقة بذلك_
وعلى أمل ♡゙.

#على_الهامش

" يارب ظلّك .. الظلّ المُمتد الذي لا ينقطع ونورك، النور الذي لا ينكسر ، امنحنا أمانك، الأمان الذي لا يُفاجئه الخوف أبدًا♥️."



- على آخر الليل.
- تنزيل صابر .

#هذا_الصباح❤️

من سنتين اتعلمت إني كل ما أقع ف مشكلة أفضل أقول: " لا إله إلا أنت سبحانك إني كنت من الظالمين ".

بطريقة ما كانت المشكلة بتتحل ، وقتها كنت بفتكر سيدنا يونس و هو ف بطن الحوت لو أنا كنت مكانه هل كنت ح ابقي متأكدة إن دي النهاية ؟ بس همن سنتين اتعلمت إني كل ما أقع ف مشكلة أفضل أقول
" لا إله إلا أنت سبحانك إني كنت من الظالمين "..

بطريقة ما كانت المشكلة بتتحل ، وقتها كنت بفتكر سيدنا يونس و هو ف بطن الحوت لو أنا كنت مكانه هل كنت ح ابقي متأكدة إن دي النهاية ؟ هو كان واثق إنو المحنة هتعدي.

السنه دي أنا بتعلم حاجة جديدة، أنو كل ما الإحباط يوصل لقلبي وأحس أن الدنيا بتقفل خلاص أفتكر قوله تعالي ف سورة الصافات :
" فما ظنكم برب العالمين" ..

فتبدأ الدنيا تنور من تاني.

حتي لو ماجات الحاجة اللي كنت بتمناها بس بقيت عارفة ومتأكدة إن وراها خير جاي كتييير ❤️.

#ريما_عباس
#يومياتي_العزيزة.

الحلقة الاولى نزلت √

بعنوان : كيف أتخلص من الخوف الإجتماعي ؟!

و الحلقة التانية .. في الطريق 🏃🏻‍♀

يُفضل المتابعة أول بأول😌💕

https://whatsapp.com/channel/0029VayVyn7A89MpgD1hGY0v/376

مساء الخير، تساؤل اليوم..

متين بطلّتَ او مليت؟

بطلت التغير، تغير نفسك للأحسن، أو تغير زول معين؟ او تنتظر يتغير ظرف ما او حاجة معينة ؟

سؤالي للحسّ بالملل من انتظار شيء أو تغيير حاجة ، وحسّ باليأس وقرر يبطّل ويكسر الحنك، كيف حالك؟

قرارك كان غلط ولا صح؟ لو غلط ندمت عليه؟.. لو صح اتجاوزته كيف؟

في الكومنتس او على البوت :
@Tanzeela99bot

صباح الخير ❤️


في لحظة تعب شديد بتكون شايف بسسسس راحتك في حاجة واحدة محددة..

تاني كل الأبواب بتكون مفتوحة لكن إنت ما دايراها.

والباب الوحيد الإنت شايف راحتك فيه بكون مقفول..

رغم إنك منطقيا عندك مفتاحه ، لكن نهائي ما بتقدر تدخله !

في اللحظة دي بس تعرف إنه ربنا مُبتليك عشان تفك التعلق بالباب دا .

أبواب ربنا كتيرة وخزائنه ملئى وسبل الراحة كتيرة .. بس إنت متعلق بي باب واحد ومن تربية الله للمؤمن يبتليه لما يتعلق.

الحاجة دي أنا عشتها بي نفسي في الحرب ، لأني كنت شايفة الراحة بس في إني أرجع بيتنا.

فـ سبحان الله حتى بعد الخرطوم بقت آمنة ، ربنا ما يسر لي الرجعة رغم إني قادرة أرجع منطقيا ..بس خالص ما اتسهلت .

هنا عرفت إني تعلقت وربنا بيأدب فيني.

وعرفت إني في رسالة من الوضع الأنا فيه لسة ما استوعبتها ،وفي دروس لسة ما اتعلمتها وفي رزق لي ولي الحوليني في اجتماعنا هنا .. بس م كنت مُدركاه

لقيت الحل في تمام العبودية والتسليم لله عز وجل .

لقيت خطئي أنا إني كنت راسمة شكل معين للفرج..

ودا فيه تعدي على الله عز وجل
اللي هو ربنا يرزقك ويفتح ليك أبواب ونِعم كتيرة وإنت بدل تحمد وتستشعر النعم تقول ليه " لا يا ربنا أنا دا كله ما دايره منك أنا بس داير الحاجة الفلانية!"

..

أنا متأكدة البوست دا ح يجي لي جزء منكم في وقته وأسأل الله أن ينفع به ويتقبله مني.

أنا تعبت وأخذت وقت لغاية ما استوعبت الدرس
وجيت أديكم الخلاصة عسى أن تكون اختصارا لدروبكم .

وربنا يرزقنا الرضا والتسليم ويعلمنا حسن الظن واليقين ❤️.


#آلاء_العوض.

في خِضم حوار عاطفي عميق مع صديقتي يومًا.. كنت أتكلم عن شعور جاثم على صدري، يسرق طمأنينتي ..فقلت:

"ما أوّل مرة أتكلم عنه."

ثم قالت :
"أنا طمّنتك مرات كثيرة، خايفة جداً ما أكون كافية لهذه الأفكار".

للحظة، شعرت بالخذلان ..
لا أنسى خفقة قلبي.
لكنني تماسكت وقلت لها:

"ما عاوزاكِ تكوني خارقة وتجيبي لي حلول ومُعجزات، بس طمنيني زي مابتعملي دايماً "

في البداية فضلت مُستاءة وحسيت بأني عبء.. لكن صديقتي لم تكن ترى ذلك، كانت فقط خائفة من "أن تفشل" .. لأن قلقي لم يختفِ رغم محاولاتها.

كانت خايفة ألا تكون جديرة، وهي أيضًا تحتاج طمأنة على إنها كانت كافية بحضورها.

أنا أتعلّم البوح، وهي تتعلّم الحضور، وهكذا دواليك.. أنا أتعلّم أسرار احتضان أمواجها، وهي تتعلّم التجرّد من حذرها.❤️

ما بين خوفك من أن تكون عبئًا، وخوفها من ألا تكون كافية ضاعت الطمأنينة التي كانا يبحثات عنها سويًا.

لكن الحقيقة؟
أن حضوركما، بكل هذا الصدق، كان أعمق طمأنينة.

ليست مهمتها أن تُنقذك، ولا مهمتك أن تخففي عنها—يكفي أن تتماسكا، حين يخذلكما العالم.
فأحيانًا، مجرد البقاء معًا بصمت، هو المعجزة التي لا تحتاج أحدكما أن يكون خارقًا❤️."

#بعض_من_اللطف

هدف من أهم اهدافي في الدنيا دي وبحاول اطبقه في حياتي قدر الامكان ، هو" اني اكون في حالي "لا احب اعرف حاجة عن حد ، ولا حد يعرف عني حاجة غير الـ انا محتاجة يعرفها وبس..

عايزا امشي على الحيط زي ما بقولو، اعيش حياة هادية وبعيدة عن الناس و حواراتهم وتعكير المزاج، نفسي اعيش في سلام عظيم مع حالي ونفسي واموري اللي محتاجه اركز عليها اكتر من الناس، و حتى لو في ناس لابدّ أركز معاهم فيكونو أهلي ونفر أو إتنين من اقرب الناس لقلبي، وكدة كفاية خااالص.

حلقتنا التانية نزلت🩷🩷✨✅

https://whatsapp.com/channel/0029VayVyn7A89MpgD1hGY0v/384

تخيل !

"...أن تُمنح شخصاً قادر على إستيعابك.. يتكّمن بدقة من إستعياب كل تلك الفوضى ، سوداويتُك ، تقلّبات مزاجك الحادة ،أخطاءك الحمقاء ، والمناطق الرمادية المُفخّخة وغير المفهومة من شخصيتك ، تخيل أحدهُم يستوعب كل ذاك الكم الغير مرغوب فيك بل يساعدك على تقبّله، ثم تقبّله هو الآخر بكل عيوبه وسوداويته الخاصة. شخصاً يُبرِز للضوء كل شيء كان برّاقاً فيك ذات يوم وإضررت لدفنه مع الوقت ، ينصهر معك لـتُشكلان خليطاً متجانساً رخواً دافئاً أزرق اللون، لـتشعر في آخر المطاف وللمرة الأولى بوحدةٍ أقل
على هذا الكوكب🤎."

- تنزيل صابر.

#معاي_حكاية_تحب_تسمع؟

كان في صوت جواي بقول لي: “العالم ده كبير.. ولازم استكشفه”

لمن كنت في السودان كان حلمي الكبير إني أحضر ماجستير بره البلد.

لكن كنت عارفة تمامًا إنو وضعي المادي ما بيسمح، فقررت أراهن على حلمي وأقدم للمنح.
قدّمت لأكتر من ٢٠٠ منحة خلال ٣ سنين، وكل يوم يجي إيميل رفض جديد.. كنت بكب الزعل وبمسح دموعي وبقدم تاني.

لكن بعد ٣ سنين، أخيرًا جاني إيميل.. اتقبلت في منحة الكورسات القصيرة في الهند.
كنت طايرة من الفرحة، وأول مرة أحس إنو في باب اتفتح.
وأنا في الهند، جاتني رسالة من جامعة Wageningen في هولندا بأني كمان اتقبلت !
رجعت السودان فورًا وبديت إجراءات السفر.

قبل سفري لي هولندا بـ ٣ يوم، جاني أيميل قبول تاني.. منحة تركيا!
لكن اخترت هولندا، ومشيت وأنا حالمة وعندي أمل كبير.

في البداية كانت الأمور مستقرة، لكن بعد ما خلصت دراستي، قررت ما أرجع.
أخدت القرار الأصعب في حياتي وقدّمت لجوء.

ما كنت فاهمة تفاصيل اللجوء، لكن قلت يمكن ده يكون طريق جديد.
فجأة، من طالبة متفوقة، بقيت لاجئة بلا حقوق.
سكنت في معسكر لجوء، لا شغل، لا دراسة، لا خصوصية، لا وطن.

بعد شهور طويلة، جاني الرفض الأول.. قدمت استئناف، وانتظرت.
سنة ورا سنة ورا سنة.. وأنا بلف من معسكر للتاني.
بس رغم الوجع، ما استسلمت.

درست اللغة الهولندية برايي، لقيت شغل كعاملة نظافة.
بدأت أقدر أصرف على نفسي، وأحس إني واقفة على رجلي.
درست كورسات في الزراعة، وعملت دبلومة في حقوق الإنسان.

ناس كتار ممكن تسأل: “كيف؟ والنظام ما بيسمح؟”
بقول ليكم: النظام بيفتح الباب للناس المجتهدين، ولو كان الباب صغير..
أنا دخلت من الشباك!

بتذكر يوم كنت ماشه في الشارع قدام جامعة أمستردام،
كنت مهمومة ومحطمة، وقفت قدام الجامعة، وقلت بصوت مسموع:
“يومًا ما، أنا حادرس هنا”

وعدى الزمن.. واليوم، ناقشت رسالة الماجستير في نفس الجامعة!
في تخصص الأنثروبولوجيا.. وفي قلبي امتنان ودمعة فرح.

القصة دي ما عشان أقول شوفوني، القصة دي عشان أقول:
الحلم بيتحقق بالتخطيط، بالتعب، وبالاعتماد على ربنا.
مافي شي بيجي ساي.. لازم تسعى، وتكون ملتزم.

في السنين دي، مريت باكتئاب، تحديات، وجع، وحدة، حرمان.
لكن قررت ما أنكسر..
واليوم، أنا حاصلة على الجنسية الهولندية وماجستير، ولسه الحلم مستمر.

أنا فخورة بنفسي،
سواء كنت عاملة نظافة أو طالبة، لاجئة أو مواطنة.
أنا البقيم نفسي، لأني أنا الوحيدة العارفة الوجع، وحجم الظروف المريت بيها ا
الاغتراب صعب، خصوصًا لبنت..
لكن علمني، وقواني، وصقلني.
ومن خلاله عرفت نسيبة الحقيقية.

*رسالتي لأي زول بيمر بنفس الظروف:*

"لو أنا قدرت، إنت كمان بتقدر.
بس امشي خطوة خطوة.. والرحلة تستحق✨."

محبتي الكبيرة ليكم.
- نسيبة تميم ❤️ .