group-telegram.com/apsua_sputnik/1265
Last Update:
Ажәа "аԥскәаба́з" аҳәашьала зынӡа иаԥсышәоуп, аха ари аԥсшәа иарсаз, ажәытәан ишиашоу абырзеншәахьтә иаланагалаз ажәоуп: επίσκοπος [epískopos] епископ, букв. "надзиратель, смотрящий".
"Аҷҟәанда́р" ашьаҭаҿы иҟоуп "аџь". Аригьы иамаԥсаху ажәоуп, гыршәала "ҷҟони диди" — "аџь ду" аанагоит, аха атермин ашьақәгылара Аԥсны аҭоурых иадҳәалоуп, аԥсуа ҳәынҭқарра наӡа-ааӡа адгьыл рацәа анаҵанакуазтәи аамҭа.
Ажәа ахы умҳәакәа аҵыхә узҳәом. Аахыҵ Кавказ ақьырсианра ааӡаанӡа агырқәа Ҷҟонидиди ҳәа иахьашьҭаз аҳаракыраҿы аџь ду игылаз иамҵаныҳәон. Ишырҳәо ала, Андреи Аԥхьанаԥхьа Қьырса ибзарӡы аларҵәо даналсуаз, уи аҵла аҩсҭаа дҭицеит, иара нас ихырҵәеит. Ишнеиуаз, VII ашәышықәсазы Ҷҟонидиди аберҭыԥ ҟалеит, аџьҵла ахьгылаз ашьапаҿыҵәҟьа аныхабаа дыргылеит. Аԥсуа аҳра ахаан ари ахәаҿы ақьырсианцәа ржуан. X ашәышықәсазы Ҷҟонидиди аныхабаа еиҭаирҿыцит Аԥсҳа Гьаргь II, иара уаҵәҟьа аԥскәабаз диртәеит, уи иахьатәи аԥыза-министр иаҟара амч иман, ипату ӷәӷәан. Иара инаиркны ари амаҵзура ныҟәызгоз Ҷҟондидели ҳәа ирышьҭан (букв. "митрополит Чкондиди"), "аҷҟәандар" ажәа уантә иаауеит.
Аныхабаа иахьагьы игылоуп, агәаҟцәа рыбаҩ аҟәырҷахақәа ҭоуп. Иара акәша-мыкәша иҿиаз ақалақь хәыҷ Мартвили ахьӡуп, уи абырзеншәахьтә "агәаҟра зхызгаз" ҳәа ицәажәоит.
Ари анҵамҭа аҩраҿы дҳацхрааит Аб Давид (Сарсаниа), иҭабуп🙏🏻
