group-telegram.com/yoshlikjurnali/5834
Last Update:
#olis_yaqin_ovozlar
OTAM, JORQIN MOMO, POYABZAL VA ShE’R
Arslonning bolasi musicha, kaptar,
Cho‘rtkesar otadan bitta lapashang.
Nima jin urdi meni,
Sen-la bir safda
Turmadim,
nuqsini yuqtirdi hasham.
Tuprog‘i sovidi Jorqin momoning —
Qo‘limdan qum kabi ketdi javohir:
Endi biror kimsa ovulda meni
Chaqira bilmaydi:
“kichina Yoqub”.
Engimda chopon-u,
qo‘llar orqada,
Qadam tashlar edim senga taqlidan.
O‘sha muqalliding topmadi sadaf,
Irga-tirgalarda ozdi aqlidan.
Tobim qochgan edi,
bo‘lsang-da emchi
Nina sancholmading,
Ilk bor yalinding.
Yalangoyoq chopding,
Axir, men quchib
Uxlardim o‘shanda poyabzalingni.
Ravon ko‘chalardan yurdim dovdirab,
Ortingdan bormadim,
sen bosgan yo‘l – sang.
Duxtir bo‘lolmasdim sendek dovyurak,
Mendan zo‘r yozarding sen shoir bo‘lsang,
Chaynaldim,
Ichimdan o‘tdi qirindi,
Sen dangal so‘zlaysan.
So‘zingga teng bir
Misra bitolmadim.
Barcha she’rimdan
Menga poyabzaling afzaldir endi.
Nurmuhammad Abduzoir
