#olis_yaqin_ovozlar

QISHLOQ HAQIDA O‘YLAR...

Barisi Xudodan, bo‘lar ish bo‘ldi,
Barini yashirdim ko‘ngil qariga.
Ichimdagi shoir chekindi beso‘z
Kuzakning navqiron shamollariga.

Ko‘nglimda sarg‘arib bir qishloq qoldi,
Bog‘lari qisinib tugmadi meva.
Kuzning ilk oqshomi. Parfini eslab,
Men seni sog‘indim, turkona sheva.

Dalaning qaqragan egatlaridan
Oy suzib keladi — sokin, beozor.
Beshmergan elining ildizlarida —
O‘razboy tabibning giyohlari bor.

Jimjit “Ulli Pir” chorbog‘larida,
Tinchlik haqda she’rlar o‘qiydi kimdir.
G‘am libosin kiygan masrur yuragim
Hali ham jimdir...

Ko‘nglim — xazonlarda to‘kilgan yaproq,
Ko‘rgani g‘am uning, chekkani ozor.
Shu osmon ostida, kuzakka qadar
Ash’orsiz yashagan tonglarim bisyor!

Hamon chorlar meni toshbag‘ir shahar,
Qishloqning ko‘ngli g‘ash,
Yuragi zada.
Yolg‘iz, yalangoyoq kezib yuribdi
Mening daydi ruhim tikanzorlarda...

Endi qolmoq uchun biron sabab yo‘q,
Iqbolin ko‘zlasin “toir”larini.
Shuncha yil shahar-chun qilar parvarish
Qishloq mendek telba shoirlarini!..

Otabek Rahim

📱Telegram 📱Instagram
📱Veb-sayt 📱Facebook

✅
OTA TILIM, O, ONA TILIM

Qat-qatingda ko‘rinur fe’lim,
Yuragimsan, qalbim va dilim.
Birlashtirding, xalq bo‘ldi elim,
Ota tilim, o, Ona tilim!

Bilga xoqon hayqirig‘i sen,
Qoshg‘ariyning chaqirig‘i sen,
Tengriqutning adl tug‘i sen,
Ona tilim – yagona tilim!

Senda suron solmishdi Temur,
Senda sobit qolmishdi Temur,
Bir so‘z-la yurt olmishdi Temur,
Ona tilim – mardona tilim!

Toyg‘oq, Arab-Ajamdan to Chin
Qanot yoyding misoli lochin.
Xurosonda ochding quloching,
Ona tilim – durdona tilim!

Alisherning ilkida chechak,
Kimga mehnat, kimgadir emgak.
Shayboniydan armonli ertak,
Ona tilim – afsona tilim!

O‘raltovlar qayragan tilim,
Hindi elda yayragan tilim,
Sanduvochlar sayragan tilim,
Ona tilim – mastona tilim!

Sog‘inganlar seni deb ado,
Vidolarda berursan sado.
Yaxshi so‘zsan, men senga gado,
Ona tilim – shohona tilim!

Iqbol MIRZO

Tilda, fikrda, ishda birlik!

Jadid.uz | Telegram | Facebook | Instagram | YouTube