group-telegram.com/tayseerelsadigo/4518
Last Update:
•قالت :
قبل رمضان بي كم يوم، خطوبتنا انتهت
لكن لحدي آخر يوم في رمضان
كنت بدعي لـخطيبي في كل لحظة وكل تراويح
وتهجُّد
ولحدي اللحظة دي بدعي ليهُ
ربنا يوفقه ويرزقه الزوجة الصالحة و يعوّضه
و يعوّضني بـالأبرَك والأحسن ♥️
•قال :
زوجتي زعلت مني في نقاش حاد حصل بيننا
مشت بيت أهلها عشان الجو يروق شوية و ترجع، قعدَت هناك
٤ يوم، طيلة الأيام الأربعة دي بترسّل تذكّرني
بـصلاة الوتر والضحى
وكل يوم
في الأيام الأربعة دي برسّل ليها أذكّرها بأذكار الصباح
والمساء لأنها دايماً بتنساهم، و بذكّرها برضو
تاخد علاجها
(عندها مرض مزمن ربنا يشفيها ويكتب أجرها)
بعد رجعت
قالت لي :
حقيقي اللي حصل بيننا ده رغم الزعل
اثبت لي إننا ماشين صاح، و إنه اختياري ليك كان نعمة
من رب السماء 🌸
•قالت :
انفصلت من زوجي قبل سنة وشوية
الحياة استحالت بيناتنا و ده نصيبنا كده الحمدلله .
في عيد الفطر وعيد الأضحى كان بجي لي أبوي ويجيب ليهُ
نوع معين من التمر عشان أبوي بحبه
وما ربط علاقته
بـأبوي وأهلي بـطلاقنا ومشاكلنا!
ما زال في قمة احترامه ليهم
وهم شاكرين فيهُ الحاجة دي جداً ودايماً بذكروهُ بالخير .
مافي رغبة للرجوع وكلنا عارفين كده
ومافي تلميح ولا فتحنا كلام ولا فتحنا اي نقاش حصل بيننا!
لكن بين أسرنا كل التقدير والإحترام
مافي أسرة اتعدّت على الأسرة التانية بـكلام أو تعامل
ما جميل
ولا حصل أي تصرّف يضايق فرد مننا ♥️
..
الفكرة كلها إنه
الناس الراقية الواعية الفاهمة
عارفة إنه النهايات بتكون بـاحترام و زوق
وحقيقة الناس بتظهر
في النهاية، لأنه البدايات دي كل الناس بتكون
حلوة و رهيبة!
عشان كده ندعي ربنا يرزقنا في كل علاقاتنا
بـي ناس مُحترَمة
حتى لو فارقناهم ما حيمشوا ينبّذونا ويطلّعوا اللي مافينا
و يسيئوا لينا!
ونتذكر كلام ربنا سبحانه وتعالى :
" وَلَا تَنسو الفَضل بَينَكُم " 🌱
في كل تفاصيل حياتنا وتعاملاتنا.
علاقات كتيرة بتنتهي ومحبة كتيرة بتروح
لكن ممكن يكون لسه في مودة وإحترام بين الناس .
الحياة قصيرة يخوانّا وما مستاهلة الحقد
والكراهية
اللي بتحصل دي كلها!
ليه نشيل في قلوبنا ونتمنى لي بعض الشر والسوء
عشان بس ربنا ما كتب لينا نواصل
أياً كانت علاقتنا
وليه ما نتعامل بي طِيبة
ونبادر بالخير والسمح ، ونظهر تفاصيلنا الحلوة اللي بتعلّي
احترامنا وتسعِد اللي حولنا ؟!🌸
فاللهمّ أن اربح دوماً ما ينير صحيفتي، أن اتخلّق بالصلاح و التقوى و الإيمان ما حيِيت، اصرف عني ما يفسد حياتي ويكدّر عُمري، أن ترضى عنّي وترحمني وتُسعدني في الدارين.
ممكن نصلّ على الحبيب! ♥️
#بيوت_متطمنة
#تيسير_الصادق
BY د.تَيسِير الصّادِق🔻|مُمكن نصلّ على الحبيب!
Share with your friend now:
group-telegram.com/tayseerelsadigo/4518