✔️پەندێك لە شێوازی بانگەوازی موسا و هاروندا و مانای قسەی نەرم کردن!

اذْهَبَا إِلَىٰ فِرْعَوْنَ إِنَّهُ طَغَىٰ
فَقُولَا لَهُ قَوْلًا لَيِّنًا لَعَلَّهُ يَتَذَكَّرُ أَوْ يَخْشَىٰ
طه ٤٣-٤٤

▪️ خوای گەورە فەرمان دەدات بە پێغەمبەران موسا و هارون (عليهما الصلوات والسلام)، دەفەرموێت:
خۆت و براکەت بڕۆن، هاوڕێ لەگەڵ ئایەتەکانی ئێمەدا کە عەصاکەیە و دەبێتە مار و دەستێکە کە کاتێك دەیخاتە بن باڵی و دەریدێنێت سپی دەبێتەوە و دەدرەوشێتەوە. لە دواییشدا ئایەتانی دیکە دێن وەك ئەو بەڵایانەی کە دابەزی بۆیان و سستی مەکەن لە یادی مندا، هەمیشە با یادی منتان بێت، بڕۆن بۆ لای فیرعەون چونکە ئەو لە سنووری بەندەیی دەرچووە.

▪️ دوای ئەوە بۆیان دیاریی دەکات چۆن هەڵوێست بگرن لەبەرامبەر فیرعەونەوە. دەفەرموێت:
جا قسەی بۆ بکەن قسەیەکی نەرم،
بەڵکو ئەگەر غافڵبوون وای لێکردووە بیر بکاتەوە، یان ئەگەر دڵیشی خاڵییە لە ترسی خوا، بە ناسینی گەورەیی خوا ترس پەیدا بکات و دەست بکێشێتەوە لەو یاخیبوونە.

⁉️قسەی نەرمی لەگەڵ بکەن یانێ چی؟

▪️ ئەمەی کە دەفەرموێت قسەی نەرمی لەگەڵ بکەن بێ ڕیسا نییە، هەر کەسێك بیکاتە بیانوو، کە هەر جۆرە سازش و هەر جۆرە قسەی هەڵەیەك بکاتە بەرنامە بەم حوججەتە کە خوا فەرموویەتی لەگەڵ فیرعەوندا قسەی نەرم بکەن!
چونکە چ لێرە و چ لە جیگای تریشدا ڕۆشن کراوەتەوە ئەو قسە نەرمە چییە.

❗️ بۆ نموونە لە سوورەتی (النازعات)دا بەم جۆرە بەیان کراوە کە دەفەرموێت: ﴿فَقُلْ هَل لَّكَ إِلَىٰ أَن تَزَكَّىٰ، وَأَهْدِيَكَ إِلَىٰ رَبِّكَ فَتَخْشَىٰ
(النازعات / ١٨ و ١٩)
دەبینین کە هیچ جۆرە داپۆشینێکی حەق و چاوپۆشیی لە حەق و هیچ جۆرە سازشێکی تێدا نییە.
دەفەرموێت بڵێ: ئایا تۆ حەز دەکەیت، ئەتەوێ و پێتخۆشە کە موتەزەککی (یانی پاک) بیت؟ کە سیفەتە باشەکان لە تۆدا گەشە بکەن بە قیمەتی ئەوەی کە سیفەتە خراپ و نالەبارەکانت لەناو بچن؟

ئایا حەز ئەکەیت و پێت خۆشە کە هیدایەتت بدەم بۆ لای خاوەنەکەت و دوای ئەوە کە ئەوت بە گەورەیییەکەیەوە ناسی لێی بترسی؟

📌نەرم مانای چیە؟
▪️ دیارە ئەم قسە چ عیززەتێکی تێدایە. نەرم بە مانا ئەوەیە لەناو تەبلیغەکەدا تووندی و تیژییەك لە خۆیەوە نەنوێنێت، نەك ئەوەی قسەکانی شل و ناتەواو بن.

▪️ دوای ئەوە کە موسا و هارون فەرمانەکەی خوا جێبەجێ دەکەن، هەر لەم سوورەتەدا باسی ئەوە دەکات کە ئاوا قسەی لەگەڵ دەکەن کە خوا فەرمانی پێ داون، وتیان:
﴿إِنَّا رَسُولَا رَبِّكَ فَأَرْسِلْ مَعَنَا بَنِي إِسْرَائِيلَ وَلَا تُعَذِّبْهُمْ ۖ قَدْ جِئْنَاكَ بِآيَةٍ مِّن رَّبِّكَ ۖ وَالسَّلَامُ عَلَىٰ مَنِ اتَّبَعَ الْهُدَىٰ﴾
(طه ٤٧).
+ هەر لە سەرەتاوە ئەوە دەخەنەوە بیری، کە تۆ خاوەنت هەیە، نەك ئەوەی کە تۆ لافی ئەوە لێ بدەی کە خاوەنی خەڵکی.

+ ئێمە دوو نێردراوی خاوەنەکە تین. کەوابوو بەنی ئیسرائیل لەگەڵ ئێمە بنێرە و وازیان لێبێنە و ئیتر ئەشکەنجە و ئازاریان مەدە.

+  ﴿قَدْ جِئْنَاكَ بِآيَةٍ مِّن رَّبِّكَ ۖ وَالسَّلَامُ عَلَىٰ مَنِ اتَّبَعَ الْهُدَىٰ﴾.
ئێمە لە لایەن خاوەنەکەتەوە نیشانەیەکمان بۆ هێناوی، نیشانەی ئەوەی کە ئێمە ڕاست دەکەین - ئەوە کە دەفەرموێت "آية" ئەوە بەیانی نەوعە، نەك ئەوەی کە بەیانی عەدەد بێت، چونکە دوو ئایەت بوون کە نەوعەکە دەگرێتەوە-

+  ﴿وَالسَّلَامُ عَلَىٰ مَنِ اتَّبَعَ الْهُدَىٰ﴾، ڕزگاریی لە ئافاتی دیار و نادیاری دونیا و قیامەت تەنها بۆ کەسێکە کە شوێنی هیدایەت بکەوێت.

+ ﴿إِنَّا قَدْ أُوحِيَ إِلَيْنَا أَنَّ الْعَذَابَ عَلَىٰ مَن كَذَّبَ وَتَوَلَّىٰ﴾:
ئێمە وەحیمان بۆ کراوە کە عەزاب و ئەشکەنجە لە لایەن خواوە لەسەر کەسێکە کە حەق بە درۆ بخاتەوە و پشتی لێ هەڵکات لە باتی ئەوەی کە ڕووی لێ بکات.

▪️ئەگەر ئینسان ورد بێتەوە لەم جۆرە وتارە دەزانێت ئەمە وتارێکە لەو پەڕی هێزدا و هیچ جۆرە سستی و لاوازیی و حەقداپۆشین و سازشکارییەکی تێدا نییە، وەك هەندێك وا تێگەیشتوون لە ڕستەی ﴿فَقُولَا لَهُ قَوْلًا لَّيِّنًا﴾، وا دەزانن قسەی نەرم ئەوەیە کە لەسەر حیسابی دەعوەتەکە بێت و ڕاستییەکان داپۆشرێن بۆ ئەوەی بانگکراوەکە نارەحەت نەبێت.

✍ کاک ناصر سبحانی
📙 کتێبی ڕاڤەی شذورالذهب، بەرگی یەکەم

🌐 @Naser_Sobhani