group-telegram.com/mushtumjurnali/4352
Last Update:
ТАБИБ БЎЛГАН МАТМУСА
“Замонавий Матмуса” туркумидан
Ўқимасдан, ўтмасдан
Уюшмами ширкатдан
Табиб бўлди Матмуса
Қишлоғида тўсатдан.
Миш-миш кетди ҳар ёққа:
– Даво топмиш майиб ҳам!
– Матмусага бу ҳислат
Юққан эмиш ғойибдан!
“Қандай касал?..”, “Қаердан?..” –
Ёзган бўлиб отини,
Имо билан шоплайди
Матмусага хотини.
Ўқиб буни, беморга
Дейди: “Бошингиз касал!”
Ҳайратдан шўрлик бемор
Ҳайқирар: “Ё, алҳазар!”
Оқсаб келар бирови,
Қақшаб келар бирови.
Ҳизрни учратганга
Ўхшаб келар бирови.
Айримлари бўзрайиб
Бўлгунича келишар.
Айримлари сўлжайиб
Ўлгунича келишар.
Пайдо бўлди кўчада
Ўзи юрар тандирлар.
Сув, нон, чой, қурут сотган
Пистафуруш кампирлар.
Вақт келганда тутиб қол,
Табиблик ҳам тижорат:
Матмуса бошлаворди
Қўшқаватли иморат.
Кийиб олиб узун тўн
Қўйиб эчки соқолни,
Текширар бирваракай
Қаранг, юзта беморни...
“Келди-кетти...” дейдими,
“Гигена”ми... ишқилиб,
Матмусавой уйғонди
Бир кун эрта чучкириб.
Хотини дер: “Дадаси,
Чопинг ими-жимида!
Дўхтирдан кучли дори
Топинг ими-жимида!”
Отдай бўлди Матмуса
Ичиб кучли зўр дори.
Навбат кутар кўчада
Илҳақ неча бемори...
Исмоилжон ШАРИПОВ,
Фарғона вилоят ИИБ Ахборот хизмати раҳбари
⭕️ Каналга обуна бўлинг👇👇👇
https://www.group-telegram.com/tr/mushtumjurnali.com
BY "МУШТУМ" журнали расмий канали 📰
Share with your friend now:
group-telegram.com/mushtumjurnali/4352