Ціханоўская ў Аўстраліі: пра бяспеку, тыранію і агульную барацьбу за дэмакратыю

У Канберы Святлана Ціханоўская ўзяла ўдзел у шэрагу мерапрыемстваў, прысвечаных бяспецы ва Усходняй Еўропе:

– на канферэнцыі «Аўтарытарны збег: расійская павестка ў Еўропе і Азіі і расійска-кітайскія адносіны», арганізаванай Міністэрствам замежных справаў Аўстраліі і Мельбурнскім універсітэтам, беларуская лідарка стала галоўнай спікеркай і распавяла пра глабальныя пагрозы аўтарытарызму:

«Пагроза свабодзе ў адной краіне ставіць пад пагрозу свабоду ўсюды. Нават тут, у Аўстраліі, можна адчуць уплыў расійскай агрэсіі праз пранікненне і дэзінфармацыю. Тыранія — як рак: калі яе не стрымаць, яна распаўсюдзіцца з падвойнай сілай. Урады, якія не паважаюць уласны народ, не будуць паважаць і суседзяў. І я лічу, што абавязак усіх дэмакратычных грамадстваў — падтрымліваць тых, хто змагаецца за аднолькавыя ідэалы і каштоўнасці».

– на форуме Аўстралійскага інстытута стратэгічнай палітыкі Святлана Ціханоўская падкрэсліла, што Беларусь і Украіна змагаюцца за тыя самыя каштоўнасці, якія Аўстралія абараняе на міжнароднай арэне: мір, правы чалавека і дэмакратыю:

«У 2022 годзе Лукашэнка дазволіў Расіі атакаваць Украіну з тэрыторыі Беларусі. Расійскія ракеты ляцелі з Беларусі, каб забіваць украінцаў. Усё гэта адбываецца супраць волі беларусаў. Калі пачалася вайна ва Украіне, яны пратэставалі супраць яе. Беларускія чыгуначныя партызаны дзясяткі разоў сабатавалі расійскія ваенныя цягнікі. Сотні валанцёраў паехалі ва Украіну абараняць яе незалежнасць. 80 з іх ужо аддалі сваё жыццё ў гэтай барацьбе.

Вядома, мы ўсе хочам міру. За гэта мы і змагаемся — і за гэта так адважна змагаецца Украіна

».

Аўстралійскі інстытут стратэгічнай палітыкі — вядучы think-tank краіны, вядомы сваёй экспертнай дзейнасцю ў пытаннях глабальнай і рэгіянальнай бяспекі, абарончай палітыкі і ўплыву аўтарытарных рэжымаў. Старшыня ASPI — былы міністр абароны Аўстраліі.

Фота: DFAT, Офіс Святланы Ціханоўскай.