group-telegram.com/prav_molitvy/652
Last Update:
☦ Молитва в часы отчаяния
ГОСПОДИ БОЖЕ СПАСЕНИЯ МОЕГО, милостивым благоволением Твоим даровавый ми жизнь сию, неизреченною силою Твоею призвавый мя от небытия в бытие и в душу мою вложивый желание искати Тя, Создателя и Бога моего: услыши мя ныне в час сей, яко скорблю. Вложи в уста моя словеса благоугодная Тебе, исполни сердце мое смиренных чувств, и ум мой благих помышлений. Ты, Господи мой и Боже мой, благоволил еси открыти ми нетварный свет повелений Твоих яко путь ко спасению вечному, призри убо и ныне с небесе, и виждь печаль мою. Ты веси, Господи, тесноту сердца моего, и широка заповедь Твоя зело. Тонкая ткань сердца моего болезненно раздирается в подвизе сохранити словеса Твоя, и изнемогает душа моя во еже тещи вслед стопам Твоим. Темже молю Тя: скоро прииди и вселися в мя, и Сам Ты соверши во мне Волю Твою святую и всесовершенную, яко Ты рекл еси пречистыми усты Твоими, яко без Мене не можете творити ничесоже от повеленнаго Тобою. Ты даровал еси мне свет сей преходящий, благоволи убо излияти на мя, недостойнаго, Твой Свет невечерний; Ты ввел еси мя в жизнь сию, исполненную напастей и нетления, подаждь убо и мне, по безмерней милости Твоей, ту святую и непреложную жизнь, юже обещал еси всем возлюбльшим пришествие Твое.
Ей, ГОСПОДИ, не отвержи моления моего, но скоро услыши мя, яко отступил еси от мене, и покры мя тьма, удалился еси от мене, и сокрушися сердце мое, и несть мира в костех моих. Егда оставляеши мя, Господи мой и Спасе мой, жизнь сия бывает ми во ад. Сего ради паки взываю Ти: не закосни, яко душа моя от безмернаго страдания может возжелати смерти. Помилуй мя, и посети мя, одинока и безпомощна, и возведи душу мою от сени смертныя, потопившыя мя. Сотвори со мною, окаяннейшим всех, знамение Божественнаго благоволения Твоего, и даждь ми узрети радость спасения Твоего, прежде даже не оставлю мир сей.
Аминь
Подпишись на наш канал https://www.group-telegram.com/ua/prav_molitvy.com
#христианство #аминь #молитва #святые #вера
BY Молитвы на всякую потребу🙏
Share with your friend now:
group-telegram.com/prav_molitvy/652