group-telegram.com/parkent_tongi/21774
Last Update:
#Кун_тартиби
Бугун Паркент тумани аҳолиси билан очиқ мулоқот қилдик. Гап шундаки, туман маркази шу кунларда кенг кўламли қурилиш фронтига айланган.
Жумладан, “Паркентсой” бўйида янги, кенг ва шинам автойўл, кўп қаватли уй-жойлар, ижтимоий соҳа, савдо ва хизмат кўрсатиш объектларининг қурилиш жараёни бошланган. Шунингдек, туман марказидаги кўприк реконструкция қилиняпти, ёз ойларида транспорт оқими кўпаядиган асосий йўлни туннель орқали Заркент ва Сўқоқ йўлига улаш ишлари кетяпти.
Энг катта янгилик шуки, Паркент туманини пойтахт билан боғловчи “Байтқўрғон – Паркент” электрлаштирилган темир йўлининг қурилиши жадал олиб борилмоқда. Бу йўлнинг умумий узунлиги 23,8 километрдан иборат. Лойиҳа доирасида 2 та ажратиш пункти, 4 та кўприк, 2 та йўл ўтказгич, 1 та туннель туридаги йўл ўтказгич, 78 та сув ўтказиш иншооти, 7 та автомобиль йўли ва темир йўли кесишмаси қурилиши режалаштирилган.
Умуман, бугун Паркентнинг қиёфаси янгиланмоқда. Туризм инфраструктураси тубдан қайта кўриб чиқилмоқда, хизматлар соҳаси ривожланиши учун қулай шарт-шароит ҳозирланмоқда. Айниқса, Паркентсой бўйида қурилаётган 97 та кўп қаватли уй-жой, унинг пастки қаватларида ташкил этиладиган гастрономик объектлар, хизмат кўрсатиш ва савдо шохобчалари ҳудуднинг иқтисодий жозибадорлигини янада оширади, сайёҳлар оқимини кўпайтиради.
Асосийси, қурилиш майдонининг фуқаролар фойдаланувида бўлган қисмида, амалдаги қонунчиликка биноан, ўзаро келишув ва холис, адолатли баҳолашдан кейин ишлар бошланади. Ҳеч кимнинг норози бўлишига йўл қўйилмайди.
