group-telegram.com/ssvuz/15752
Last Update:
❗️Сўнгги 3 йилда юртимизда 15 та янги нейрожарроҳлик амалиёти йўлга қўйилди
✅ Замонавий нейрохирургия жарроҳликнинг “энг ёш” соҳаларидан биридир. Унда клиник тиббиётнинг периферик ва марказий асаб тизими органик касалликлари ўрганилади.
🏥 Вазирлар Маҳкамасининг тегишли қарорига асосан Республика ихтисослаштирилган нейрохирургия илмий-амалий тиббиёт маркази юртимиз аҳолисига нейрожарроҳлик ёрдами кўрсатиш бўйича бош тиббиёт муассасаси этиб белгиланган.
🖇 Марказ 130 ўринга мўлжалланган, унда қон томирлари, болалар, орқа ва бош мия нейрохирургияси, периферик нервлар патологияси ва реабилитацияси, нейроонкология, шошилинч нейрохирургия бўлимлари фаолият юритади. Уларда болалар ва катталарда учрайдиган нейрохирургик касалликларни диагностика қилиш ва даволашда энг замонавий юқори технологияли усуллардан фойдаланилади. Республика ҳудудларида марказнинг 13 та филиали фаолият кўрсатмоқда.
🩺 Бу ерда нафақат Ўзбекистондан, балки бир қатор яқин ва узоқ хориж давлатларидан келган беморлар даволаниб, шифо топади.
📊 Ҳозир жаҳонда тиббиёт йўналишида жуда катта ютуқлар қайд этилмоқда. Марказ ходимлари ҳам тегишли йўналишлар бўйича мунтазам малака ошириб, кўплаб амалий ва илмий натижаларни қўлга киритишяпти. Республика бўйлаб охирги уч йил давомида 15 та янги услубдаги нейрожарроҳлик амалиёти йўлга қўйилди.
🧠 Масалан, бош мия ўсмаларининг даволаниш турлари қаторига ўсмаларнинг озиқлантирувчи қон-томирлари орқали интраартериал ва юқори технологик кимётерапия амалиётининг қўшилиши бундай касаллик билан оғриган беморлар ҳаёт сифати яхшиланиши, ўсмаларнинг ўсиш тезлиги сустлашиши ва ўлчамлари кичрайишига эришишга замин бўлди.
📈 Амалиёт кам инвазивлиги, умумий кимётерапияга нисбатан интоксикация ҳолатлари камлиги ва қон таҳлиллари натижаларига минимал таъсир кўрсатиши билан ажралиб туради. Амалиётдан кейин беморларда ўртача умр кўриш даражаси узайиши қайд этилаётгани қувонарли ҳолатдир.
👁 Интраартериал кимётерапия амалиёти яна бир йўналиш — болаларда учрайдиган ёмон сифатли тўр парда ўсмаси, яъни ретинобластомаларнинг даволаниш даражаси ошишига ҳам сабаб бўлди. Онкоофтальмологлар билан ҳамкорликда 2022 йилда амалиётга жорий қилинган ушбу усул натижасида кўплаб болажонларимизда нафақат кўзнинг сақлаб қолиниши, балки кўриш функцияси ҳам яхшиланишига эришилди.
🔸 Олдинлари беморлар ушбу усулларни қабул қилиш учун чет эл клиникаларига даволаниш учун боришга мажбур бўлган бўлса, эндиликда марказнинг интервенцион нейрожарроҳлар жамоаси бундай операцияларни юқори муваффақият билан амалга оширишяпти.
📋Бундан ташқари, марказда бош мия жарроҳлиги қаторида эпилепсия жарроҳлиги амалиётлари ҳам бажарилади. Сўнгги маълумотларга кўра, дунё бўйича эпилепсия билан 70 миллион нафардан ортиқ инсон касалланган. Шулардан 30 фоизи фармакорезистент, яъни дори препаратлари таъсирига берилмайди. Марказда эса касалликнинг айнан шу тури ҳам операция қилинади.
🔹Эпилепсия жарроҳлиги беморларнинг тутқаноқ хуружларини камайтириш ёки улардан бутунлай қутилиш имконини яратади. Бу эса мамлакатимизда ногиронликнинг камайишига хизмат қилади.
📌 Марказ шифокорларининг эришилган натижалар билан чекланмай, ўз ғоялари асосида юқори технологияли жарроҳлик операцияларининг инновацион турларини амалиётга дадил жорий қилиши кўплаб беморларнинг буткул соғайиши ҳамда юртимизда соғлом авлод шаклланишига хизмат қилмоқда.
Соғлиқни сақлаш вазирлиги
Матбуот хизмати.
@ssvuz | @ssvmatbuotkotibi | Facebook | Instagram
BY Соғлиқни сақлаш вазирлиги | Вакцина – ягона чора!
Share with your friend now:
group-telegram.com/ssvuz/15752